Wari uzi ko amababi y'ipera ashobora kugufasha kwita ku musatsi wawe?

Inyandiko yasohotse mu kinyamakuru Times of India igaragaza uburyo amababi y’ipera ashobora gufasha umusatsi wawe:

Amababi y’ipera arimo antioxydants, hamwe na antibacterial vitamin, byose bishobora gufasha mu kubungabunga umusatsi wawe ukarushaho kuba mwiza. 

Amababi y’ipera kandi akungahaye kuri vitamine C na flavonoide nka quercetin, bishobora kugabanya gucika no kwangirika kw’umusatsi ndetse no gufasha mu gutuma amaraso atembera neza mu mutwe.

Gukoresha amababi y’ipera bishobora gufasha mu gutuma umusatsi wawe ukura vuba ukanarushaho kuba muremure ku bwinshi, umusatsi wawe kandi urushaho koroha no gusa neza.

Dore uko ushobora gukoresha amababi y’ipera ku musatsi wawe, nk'uko byatangajwe na National Institute of Health (NIH);

Uburyo bwo gukoresha amababi y’ipera ku musatsi wawe buroroshye cyane, ndetse wanabyikorera ku giti cyawe. Ushobora gufata amababi y’ipera ukayatogosa mu mazi, ukabimaza ku muriro igihe kiri hagati y’iminota 20 n’iminota 25 kugira ngo bibanze bitogote ndetse byivange neza. 

Nyuma ukabikura ku muririo ukareka bigakonja, hanyuma ugafata ayo mazi ukayakoresha wiga  mu musatsi wawe mu gihe uri koga mu mutwe. Ibi bishobora gutuma uburebure bw’umusatsi wawe burushaho kwiyongera ku bwinshi.

Ushobora kandi gufata amababi y’ipera mabisi ukayasekura maze ugakoresha amazi ukuyemo ukayasiga mu musatsi wawe. Ubimazamo iminota 15 kugeza ku minota 20, hanyuma ukabona koga mu mutwe. 

Ubu buryo ni bwiza cyane, ndetse bwafasha umuntu ufite umusatsi ukunda gucika, ushobora rero kubukoresha mu gihe ushaka kurinda umusatsi wawe gucika.

Ubundi buryo ushobora gukoresha amababi y’ipera ku musatsi wawe ni ugufata amababi y’ipera yumye ukayasya neza ugakoramo agafu kameze nk’amajyani, ubundi ukayateka mu mazi nk’icyayi. 

Fata igikombe kimwe cy’amazi wongeremo ikiyiko cy’ifu y’amababi y’ipera maze ubishyire ku muriro mu gihe kingana n’iminota 10 kugeza ku minota 15. 

Nyuma utegereze ko bihora hanyuma ufate amazi yawe wavanze n’amababi y’ipera uyasige mu musatsi wawe nyuma yo koga mu mutwe.

National Institute of Health (NIH) ivuga ko, n’ubwo amababi y’ipera ashobora kugufasha mu kwita ku musatsi wawe, ni ngombwa kumenya ko gucika kw’umusatsi wawe bishobora guterwa n’impamvu zitandukanye. 

Niba ukoresheje ubu buryo ariko bigakomeza kunanirana, ahubwo umusatsi wawe ugakomeza gucika, ugomba gutekereza gukoresha ubundi buryo burimo no gukoresha amavuta atandukanye yo mu mutwe cyane cyane akomoka ku bimera.