Ikipe ya Liverpool yatsinze Wolves mu mukino wo ku munsi wa 25 wa shampiyona y'icyiciro cya mbere mu Bwongereza, ikomeza gushyiramo ikinyuranyo cy'amanota 7 hagati yayo na Arsenal.
Ni mu mukino wakinwe kuri iki Cyumweru Saa Kumi z'umugoroba kuri Anfield Stadium.
Umukino watangiye ikipe ya Liverpool ihererekanya umupira kuva inyuma kugeza mu kibuga hagati ariko kurema uburyo buvamo igitego bikaba ikibazo.
Ku munota wa 15 yaje gufungura amazamu ku mupira mwiza Alexis Mac Allister yarahaye Diogo Jota nawe awushyira kwa Luis Diaz awusunikira Mohamed Salah nawe agiye kuwumusubiza birangira ukubise mu maguru ya myugariro n'ubundi uramusanga ahita atsinda igitego.
Wolves yagiye inyuzamo igashaka gusatira ibinyujije kuri rutahizamu wayo Matheus Cunha ariko ba myugariro ba Liverpool barimo Ibrahim Konate bakaba maso.
Ku munota wa 37 Liverpool yabonye penaliti ku ikosa umunyezamu wa Wolves, Jose Sa yari akoreye Luis Diaz mu rubuga rw'amahina.
Yahise iterwa na Mohammed Salah ayishyira mu nshundura igitego cya kabiri kiba kirabonetse.
Mu gice cya Kabiri amakipe yombi yaje akora impinduka mu kibuga aho ku ruhande rwa Liverpool havuyemo Ibrahim Konate hajyamo Jarell Quansah naho ku ruhande rwa Wolves havamo Pablo Sarabia na Concalo Guedes hajyamo Marshall Munetsi na Jean-Ricner Bellegarde .
Ku munota wa 50 Wolves yashoboraga kubona igitego ku mupira Jean-Ricner Bellegarde yarahaye Marshall Munetsi arekura ishoti gusa Allison Backer aratabara.
Ku wa 67 iyi kipe yaje ku kibona igitego gitsinzwe na Matheus Cunha ku mupira yari ahawe na Jean-Ricner Bellegarde.
Mbere y'uko umukino urangira, Wolves yasatiriye cyane ariko ba myugariro ba Liverpool bihagararaho birangira begukanye amanota 3 ku ntsinzi y'ibitego 2-1.
Liverpool yakomeje kuba ku mwanya wa mbere n'amanota 60 aho irusha amanota 7 Arsenal iyikurikiye.
Ni mu gihe Wolves yo yakomeje kuba ku mwanya wa 17 n'amanota 19.
Liverpool yatsinze Wolves ibitego 2-1
Eng
RSS 
TANGA IGITECYEREZO