Haaland afite umujinya! Impamvu 6 Man City ishobora gutsinda Real Madrid muri Champions League

Nubwo Man City iri mu bihe bitameze neza kurusha uko byari bimeze mu myaka 15 ishize, Real Madrid nayo ifite intege nke zishobora gutuma iyi kipe yo mu Bwongereza iyigusha mu mutego. Aya makipe yombi aracakirana mu mukino ubanza muri gahunda yo gushaka itike ya 1/8.

Dore impamvu esheshatu zatuma Manchester City ibasha gutungura Real Madrid:

1. Ubwugarizi bwa Real Madrid buhagaze nabi

Real Madrid ifite ibibazo bikomeye mu bwugarizi kubera imvune. Antonio Rudiger, wari umwe mu bakinnyi bayoboye ubwugarizi bwa Madrid umwaka ushize, arimo kuvurwa kandi azasiba umukino wa mbere n'uwa kabiri.

Eder Militao na David Alaba nabo baracyavurwa imvune, bivuze ko Madrid izakina n’umukinnyi umwe usanzwe ari myugariro w’umwuga, Raul Asencio, ushobora gukorana na Aurélien Tchouaméni usanzwe akinira hagati.

Ku mpande z'ubwugarizi naho ibintu ntibigenda neza kuko Dani Carvajal na Lucas Vazquez bafite imvune, bishobora gutuma Pep Guardiola abasha gukoresha abataka be b'abanyembaraga nka Erling Haaland na Phil Foden.

2. Vinicius Jr yatakaje umwimerere we

Nyuma y’imvune yagize mu Ugushyingo, Vinicius Jr ntiyagarutse mu bihe bye byiza. Mu mukino Real Madrid yanganyijemo na Atletico Madrid 1-1, yagize amahirwe yo gutsinda ariko ntiyayabyaza umusaruro.

Mu mikino 10 aheruka gukina muri shampiyona, nta gitego aratsinda, ndetse hari amakuru avuga ko ashobora kuba atakiri ku rwego rwo hejuru nk’uko byari bimeze mbere. Ibi bishobora kuba amahirwe kuri Manchester City, kuko uyu mukinnyi yagiye agora abakinnyi bakina mu bwugarizi mu bihe byashize.

3. Real Madrid itsindwa imikino ikomeye

Nubwo Man City yatsinzwe na Arsenal, Liverpool na Manchester United uyu mwaka, Real Madrid nayo yagaragaje intege nke mu mikino ikomeye. Yatsinzwe na Barcelona ibitego 4-0, itsindwa na Athletic Club, ndetse yanganyije imikino yombi yakinnye na Atletico Madrid.

Mu mikino ya Champions League, Madrid yatsinzwe na AC Milan ndetse na Liverpool, bigaragaza ko nayo ari ikipe ishobora gutsindwa. Guardiola ashobora kubyaza umusaruro iyi myitwarire idahambaye ya Real Madrid.

4. Abakinnyi bashya ba Man City bafite byinshi byo kwerekana

Manchester City yaguze abakinnyi bakomeye mu kwezi kwa Mutarama, igura abakinnyi bashya nka Omar Marmoush, Abdukodir Khusanov, Vitor Reis na Nico Gonzalez. Abo bakinnyi bafite inyota yo kwigaragaza, kandi bashobora gutanga umusanzu ukomeye mu mikino nk’iyi ya Champions League.

Marmoush yatsindiye Eintracht Frankfurt ibitego byinshi mbere yo kwerekeza muri City, naho Nico Gonzalez ni umwe mu bakinnyi bashobora guha Pep Guardiola uburyo bushya bwo gukina hagati. Aba bakinnyi bashya bishimira imikino ikomeye nka Champions League, bivuze ko bazatanga imbaraga nshya.

5. Erling Haaland afite inyota yo gutsinda Real Madrid

Erling Haaland ntiyari mu kibuga ubwo Man City yakinaga na Leyton Orient mu gikombe cy’Igihugu, bivuze ko afite umwanya wo kuruhuka no kwitegura neza.

Haaland ntiyari yatsinda Real Madrid mu mikino 4 amaze guhura nayo, ariko ubu afite amahirwe yo kubikora kuko ubwugarizi bwa Madrid buhagaze nabi. Uyu rutahizamu afite ubushobozi bwo gutsinda ibitego byinshi, kandi yifuje kugira icyo ahindura muri iyi mikino.

6. Guardiola azi uko atsinda Real Madrid

Pep Guardiola amaze gukina na Real Madrid inshuro 25, atsinda 13, anganya 6, atsindwa 6. Yigeze kuyitsinda 6-2 na 5-0 ari umutoza wa Barcelona, bigaragaza ko azi neza uko bakina.

Mu 2023, Man City yanyagiye Real Madrid ibitego 4-0, kandi Guardiola yifuza kongera gukora amateka. Nubwo Carlo Ancelotti yegukanye Champions League inshuro 5, Guardiola na we arashaka kongera iki gikombe ku nshuro ya 4 mu mateka ye nk'uko bikubiye mu busesenguza bwa Goal.com ducyesha iyi nkuru.