Pep Gualdiola yaburiye Real Madrid anacyeza Vinicius Jr utaratwaye Ballon d’Or

Guardiola yabajijwe niba gukina na Real Madrid muri iki cyiciro bitagabanya uburyohe bw’uyu mukino, asubiza mu magambo make ati: "Tombola ni ko yagenze, kandi twakiriye uko ibintu bimeze. Twiteguye guhangana."

Real Madrid ni imwe mu makipe afite amateka akomeye muri Champions League, ndetse Guardiola yemeye ko iri mu makipe y’intangarugero. 

Ati: "Mu Burayi, nta makipe menshi afite amateka nk’aya Real Madrid," Yongeyeho ko Man City ititwaye neza mu matsinda, bityo bikaba byaratumye ihura n’iyi kipe ikomeye hakiri kare.

Muri iyi myaka ya vuba, aya makipe yombi yahuriye kenshi muri Champions League, ariko Guardiola yavuze ko atabifata nk’ubucyeba bukomeye. Ati: "Mu mateka rusange, sintekereza ko dufitanye ubucyeba bukomeye. Ariko mu myaka ya vuba, yego, twakinnye kenshi."

Yakomeje agira ati: "Si ibisanzwe gukina inshuro nyinshi n’ikipe imwe, ariko Real Madrid na Bayern Munich ni amakipe ahoraho muri iri rushanwa. Manchester City na yo yagiye itera imbere mu myaka icumi ishize."

Umutoza wa Man City yakomoje ku kuba Real Madrid yaranze kwitabira umuhango wa Ballon d’Or nyuma y’uko hatangajwe ko Vinícius Jr atari we uzayegukana. Icyakora, Guardiola yavuze ko nta kibazo abibonamo, ati: "Oya, nta kibazo. Nishimiye Rodri. Vinícius Jr na we yagize umwaka mwiza cyane."

Man City irakira umukino wa mbere, mu gihe uwo kwishyura uzabera ku kibuga cya Santiago Bernabéu. Guardiola yemeye ko izi ari ingaruka z’uko batitwaye neza mu matsinda.

Ati: "Twari dukwiriye kuba aho turi. Ntitwakoze ibikwiye ngo tube twakiriye umukino wa kabiri." Ariko yongeyeho ko Man City ifite ikintu cyihariye, kandi yizeye ko bazabigaragaza.

Guardiola yavuze ko amakipe yombi yagize ibibazo by’imvune ariko Real Madrid ikaba yarabashije gukomeza kwitwara neza muri shampiyona. Ati: "Madrid iracyari ku mwanya wa mbere kandi irahangana na Atlético Madrid. Byongera kwerekana ko ari ikipe ihozaho mu gutsinda."

Yakomeje agira ati: "Dufite Real Madrid nk’uwo tuzahangana ukomeye. Tuzakina imikino ibiri myiza kugira ngo tubashe gukomeza."

Guardiola yashimye cyane abakinnyi b'imbere ba Real Madrid, avuga ko bigoye kubakumira. Ati: "Biragoye kubahagarika mu minota 90, 120, cyangwa 200. Ni abakinnyi badasanzwe. Ugomba kugerageza kubuza ko bagira uruhare rwinshi mu mukino, ariko nta mpamvu yo kubagirira igitutu burundu."

Umutoza wa Man City yashimangiye ko nta bwoba bwo gukina na Real Madrid afite 

Pep Gualdiola yavuze ko n'ubwo Vinicius atatwaye Ballon d'Or ari umukinnyi mwiza