Ahabanza Cinema

Abakunzi ba Sinema Nyarwanda bashyizwe igorora! Filime 10 zigezweho wareba muri Weekend – VIDEO

Yanditswe na: Brenda MIZERO
Taliki:31/01/2025 17:17 0

Bitandukanye n'uko byahoze mu myaka yatambutse, uruganda rwa Sinema Nyarwanda ntirukiri nkene kuko rugenda rwaguka binyuze mu banyempano bashya bagenda bigaragaza bakazana filime nshya kandi zigakundwa ku kigero gitangaje.

Iyo witegereje kuri YouTube muri iki gihe ubona ko abantu batagisuzugura filime Nyarwanda nk'uko byahoze, kuko imibare y'abazireba igenda yiyongera nk'uko na zo zirushaho kuba nyinshi kandi ukabona ko zashowemo amafaranga afarika ndetse zikoranye ubuhanga.

Mu gihe rero bizwi ko kuva ku wa Mbere kugeza ku wa Gatanu henshi aba ari iminsi y’akazi, ndetse usanga abantu benshi bahuze cyane ku buryo bakenera ibibafasha kuruhuka mu gihe cya Weekend, InyaRwanda yabatekerejeho ibategurira filime zikunzwe mu Rwanda zabafasha kuruhuka.

Kimwe mu bifasha abana kuruhuka neza ni ukureba filime cyane cyane iziba ziherutse kujya hanze hirya no hino ku Isi.

Izi ni zimwe muri filime nyarwanda ziherutse kujya hanze, zagufasha gusoza icyumweru neza:

1. Bamenya Series

Filime ya “Bamenya Series” ya Benimana Ramadhan ni imwe muri filime zasohotse muri iki cyumweru, ikaba igarukanye Season ya 15 kuri Episode ya 13.

2. Umuturanyi

Mugisha Emmanuel [Clapton Kibonke] muri iki cyumweru dusoza yahaye abakunzi ba filime Umuturanyi ibice bibiri by’iyi filime.

3. Amarira y'Urukundo

Filime 'Amarira y'Urukundo' yamamaye cyane mu myaka myinshi yashize, yasubiwemo, yongera kugaragaramo Kayumba Vianney wamamayemo nka Manzi ndetse na Mukasekuru Hadidja uyikinamo yitwa Fabiola.

Abakurikira iyi filime bageza ku gice cya gatatu.

4. Papa Sava

Niyiteka Gratien wamamaye nka Papa Sava muri iyi filime y’urwenya iri mu zirebwa na benshi muri iki gihe, yahaye abakunzi bayo ibice bitatu. Iyi filime igeze ku gice cya 1206.

5. My Father in Law

Ni filime imaze igihe itambuka ku muyoboro wa YouTube wa Impanga TV, aho abayikurikira muri iki cyumweru bahawe ibice bine, ikaba igeze kuri EP 257.

6. My Heart

Filime 'My Heart' ica kuri Killaman Empire, yagarukanye igice cyayo cya 708, ariko abayikunda bahawe ibice birenga bitanu muri iki cyumweru dusoza.

7. Ibanga Series

Filime “Ibanga Series” ni filime ya gatatu ya Nyambo Jesca itambuka kuri YouTube Channel ye ya Miss Nyambo. Iri mu ziri kurebwa cyane kuko isohoka kenshi gashoboka, aho muri iki cyumweru gusa hasohotse ibice birindwi.

8. Umumiliyoneri

Ni filime itambuka kuri Press Vision, igaragaramo umusore w’umukire w’umumiliyoneri wihinduye umukozi wo mu rugo kubera urukundo. Abayikurikira bageze ku gice cy gatandatu.

9. Behind Series

Iyi ni imwe muri filime nshya zigezweho mu Rwanda. Igaruka ku nkuru y'abakobwa barimo Amanda na murumuna we Eva bisanga mu muryango nyina wabo yarabeshye uwo baba bita Se, ko abana ari abe kandi uwo mugabo atabyara.

Iyi filime igeze kuri S2 EP18, igaragaramo abakinnyi ba filime bamaze kumenyekana nka Saranda Oliva Mutoni, Dylan Shemaryimanzi na Nana Nadine Iradukunda.

10. My Daughter

Iyi ni filime nshya y'umukinnyi wa filime Micky wahoze akundana na Captain Regis. Iri mu zikunzwe cyane, aho abayikunda bahawe ibice bitanu kuko isohoka buri munsi. Ikinamo abakinnyi bakomeye ba filime barimo uwamamaye nka Mama Nick, Fabiola n'abandi, ikaba igeze ku gice cya 76.