Minisitiri Utumatwishima yagaragaje isomo urubyiruko rwakwigira ku mateka y’urugamba rwo kubohora Igihugu

Mu butumwa yanyujije ku rubuga rwa X, Minisitiri Dr. Utumatwishima yabwiye urubyiruko ko mu mateka yo kubohora igihugu, Abakada b’inkotanyi bagiraga umwanya wo kwiga amateka, politiki n’ibindi.

Yakomeje ababwira ko aba bakada bigaga isomo ryitwa “Scope of international trouble spots (ITS)” (Urusobe rw’ibibazo biri mu bice bitandukanye by’isi), ryabafashaga kumenya isano y’ibibazo biri mu isi n’ibibazo by’u Rwanda ndetse n’isomo byazana mu rugamba barimo.

Ni muri urwo rwego yahereyeho akangurira urubyiruko kwiga gusesengura ibibera mu isi, bakamenya isano bifitanye n’u Rwanda, aragira ati: “Iyo umuyobozi w’i Burayi, cyangwa UN, cyangwa US abivuzeho, bisobanuye iki kuri twe?”

Minisitiri Utumatwishima yakomeje agira ati: “Si byiza, kubibona nk’amakuru asanzwe, ni ibyo gusesengura, ukamenya icyo u Rwanda rubivugaho ndetse nawe byaba ngomba ugashyiramo igitekerezo mu Gifaransa cyangwa mu Lingala bijyanye no gusobanukirwa ugezeho (level of understanding).”

Yaboneyeho no kubarangira aho bakura amasomo ajyanye n’ubu butumwa, ndetse no kwigira ku butumwa bunyuranye bwuje impanuro za Perezida Paul Kagame zisobanura uko u Rwanda rwitwara mu bibazo biri mu Isi.