Guteza imbere abagore n’abakobwa ntabwo ari politiki nziza gusa ahubwo ni ingenzi - Minisitiri Uwimana

Ni ibyo yagarutseho ku wa 23 Mutarama 2025, mu mwiherero w’abagize Umuryango w’Aba-Guides ku Isi (WAGGGS) ufatanyije n’Umuryango w’Aba-Guides mu Rwanda bateraniye i Kigali.

Umwaka ushize, ni bwo u Rwanda rwaje ku mwanya wa mbere mu guteza imbere abagore mu nzego zifata ibyemezo, mu gihe ababarizwaga mu Nteko Ishinga Amategeko bari bageze kuri 63.75%.

Cuba ni yo igwa mu ntege u Rwanda mu kugira abadepite b’abagore benshi. Mu badepite 470 ifite, abagera kuri 262 ni abagore, bangana na 55.7%. Iki gihugu gikurikirwa na Nicaragua ifite abadepite 91 abagore bakaba 49 bangana na 53.8%.

Ibindi bihugu biri mu bya mbere bifite abadepite benshi b’abagore birimo Andorra, Mexique na Nouvelle-Zélande na Leta Zunze Ubumwe z’Abarabu zifite 50%.

Minisitiri Uwimana yagaragaje ko nubwo u Rwanda ruri ku isonga mu guha abagore n’abakobwa uburenganzira n’inshingano zo kuyobora, Afurika ifite 60% by’urubyiruko ruri munsi y’imyaka 25 ariko abakobwa bari muri icyo kigero bagihura n’imbogamizi mu kubona imyanya mu nzego zifata ibyemezo.

Yongeyeho ko hagikenewe kongerera ubushobozi urubyiruko rw’abakobwa rukitabira kuyobora no kujya mu myanya ifata ibyemezo.

Ati: “Mu gihe twishimira ibyo twagezeho, haracyari imbogamizi. Afurika ifite umubare munini w’urubyiruko ruri munsi y’imyaka 25, gusa abakobwa bari muri icyo kigero baracyahura n’imbogamizi zibabuza kuba abayobozi, ni ibintu bikenewe gushyirwamo imbaraga kugira izo mbogamizi ziveho.”

Minisitiri Uwimana kandi yavuze ko guha abagore n’abakobwa ubuyobozi bikwiye kuva muri politiki bikajya mu bikorwa kuko bifite akamaro.

Ati: “Guteza imbere abagore n’abakobwa binyuze mu gusangira ubuyobozi hagati y’abantu bakuru n’urubyiruko, ntabwo ari politiki nziza gusa ahubwo ni ingenzi.”

Kugeza ubu uretse mu Nteko Ishinga Amategeko y’u Rwanda, abagore bihariye umwanya munini no mu nzego zisanzwe z’ubuyobozi, ndetse ni ngombwa ko abagore bagomba kwiharira 30% by’abayoboye urwego runaka mu gushimangira ihame ry’uburinganire.

Ni mu gihe bamwe mu bagore babashije kugera mu nzego z’ubuyobozi basanga kuba umugore yarahawe umwanya ukomeye ari umusanzu ukomeye utuma umuntu agira uruhare mu guharanira ubumwe bwa Afurika.

Minisitiri w'Uburinganire n'Iterambere ry'Umuryango, Uwimana Consolee yavuze ko guha abagore n'abakobwa ubuyobozi bikwiye kuva muri politiki bigashyirwa mu bikorwa