Ejo hashize ku itariki ya 18 Mutarama, abantu benshi bahuriye mujyi wa Washington DC mu myigaragambyo bamagana ubuyobozi bwa Donald Trump watorewe kuyobora Leta zunze Ubumwe za Amerika.
Inkuru dukesha ikinyamakuru The New York Post, ivuga ko abaturutse mu miryango iharanira uburenganzira bw’abagore, abarwanya ivangura n’abandi benshi bahuriye hamwe mu kwigaragambya barwanya gahunda ziteganyijwe na Trump nk'uko yabigaragaje mu gihe cyo kwiyamamaza, bavuga ko zizahungabanya uburenganzira bwabo.
Bamwe mu bari mu myigaragambyo bari bambaye ingofero z’ibara rya pinki nk’uko byagaragaye mu myigaragambyo ikomeye cyane yarwajyaga irahira rya Trump rya mbere muri 2017. Abigaragambyaga bakomeje urugendo muri Downtown, banyura imbere y’Inzu y’Umukuru w’Igihugu (White House) berekeza kuri Lincoln Memorial ku muhanda wa National Mall, ahabereye "People’s March."
Nubwo imyigaragambyo yabaye itari ikabije ugereranyije n’iyabaye mu 2017, biragaragara ko imiryango iharanira burenganzira bw’abagore muri Amerika idashyigikiye Trump nyuma yo gutsindwa kwa Kamala Harris, umukandida w’abademokarate. Abateguye imyigaragambyo bateganyaga ko abasaga 50,000 bari bwitabire, ariko abapolisi b’aho bategetse ko batagomba kurenga 25,000.
Nk'uko Trump yasezeranyije gukora impinduka zikomeye mu minsi ye ya mbere ari ku butegetsi hari abavuga ko batabyishimiye "Abantu benshi barahangayitse," ibi Olivia Hoffman, w’imyaka 26, ukorera muri Young Women’s Freedom Center muri California, yabivuze asobanura impamvu yagiye kwigaragambya hamwe n’umubyeyi we mu mujyi wa Washington.
Imyigaragambyo yo ku wa Gatandatu yari ikubiyemo impamvu zitandukanye, harimo ikibazo cy'abimukira, demokarasi, ihindagurika ry’ibihe n’intambara iri muri Gaza. Abigaragambyaga bari bitwaje ibyapa biriho amagambo arwanya ubutegetsi bwa Trump.
Imyigaragambyo yabaye mu mutuzo, aho imodoka za polisi zanyuraga hafi y’abigaragambya. Umwe mu bari mu myigaragambyo, wari wambaye ingofero ya MAGA itukura, yafashwe n’abashinzwe umutekano ubwo yageragezaga kurenga aho batari bemerewe kurenga no guteza akavuyo. Abigaragambya bari bambaye utwenda twanditseho amagambo nka "Feminists v. Fascists" na "People over politics."
Nancy Robinson, umubyeyi w’imyaka 65, wahoze akora mu bijyanye n’icapiro n’ikoranabuhanga, yagize ati, "Ndishimye ko mbona hari abantu bacyizera ko Trump yagombaga gutsindwa amatora. Ariko ntabwo ndi umwe muri bo, nge numva ko twatsinzwe."
Washington DC habereye imyigaragambyo irwanya ubutegetsi bwa Trump mbere y'irahira rye
Eng
RSS 
TANGA IGITECYEREZO