Umuryango wa Conrad Nyabuto urasaba ubutabera nyuma y'uko uyu musore yishwe n'umukunzi we mu buryo bwa kinyamaswa, aho yamuteraguye ibyuma mu nda inshuro 27, bikamuviramo kuva cyane, nyuma agapfa.
Inkuru dukesha ikinyamakuru Citizen Digital ivuga ko, Nairobi imvururu n'impagarara ari byose aho abaturage bahatuye, ndetse n'umuryango wa Conrad bashaka ubutabera, bakavuga ko batazigera bihanganira ibikorwa by'ubunyamaswa mu gace kabo.
Uyu muryango ukomoka muri Saika Estate i Nairobi, uvuga ko nubwo hari ibimenyetso bihagije rwose, byerekana ko Conrad yishwe kandi ibimenyetso bihari bigashimangira ko yishwe n'uwari umukunzi we, nta kintu kigaragara kiri gukorwa mu gukurikirana uwo mukobwa ngo abiryozwe.
Se wa Conrad avuga ko umwana we, wari uwa gatatu mu bana batanu, yahitanywe n'umukunzi we bari kumwe mu gihe yari yagiye kumusura, nyuma y'uko bari bafitanye ibibazo mu rukundo rwabo. Umurambo wa Conrad wasanganywe ibikomere byinshi, aho ngo yatewe ibyuma mu nda inshuro 27.
Ubuhamya bwatanzwe, buvuga ko Conrad yari yatumiwe n'umukunzi we wari utuye mu karere ka Kamakis kugira ngo baganire ku bibazo byari bihari mu rukundo rwabo. Nyuma rero bamusanze mu nzu y'umukunzi we yapfuye kandi bigaragara ko yabanje gukorerwa itotezwa mbere yo kwicwa.
Abashinzwe iperereza bavuga ko ukekwaho ubu bwicanyi ari Salome Wanjiru, bikaba biteganyijwe ko aburanishwa uyu munsi tariki ya 16 Mutarama 2025 mu Rukiko rw'Intara rwa Thika. Ubwo bwicanyi bwabaye tariki 17 Ukuboza 2024, kugeza ubu abantu bakaba bakomeje kuvuga ko nta butabera buba muri Kenya, ngo kubona umuntu akora icyaha nk'icyo akamara ukwezi kose atarakatirwa.
Umuryango wa Conrad urasaba ko ubutabera bwakurikiza inzira zose zishoboka kugira ngo uwakoze ubu bwicanyi abiryozwe.
Eng
RSS 
TANGA IGITECYEREZO