Barataka gukura kw'amabere mu buryo budasanzwe nyuma yo gufata urukingo rwa Covid-19

Byatangajwe ko abagore benshi mu Bwongereza bavuze ko amabere yabo yakuze cyane nyuma yo gufata urukingo rwa Covid-19. Iyi nkuru, yatangajwe na Dailymail, ivuga  ko abahanga bemeza ko ibi bishobora kuba bifitanye isano n’imyitwarire idasanzwe y’umubiri ku rukingo. 

Icyegeranyo cya  Medecines and Healthcare products Agency (MHRA) cyerekanye ko hari raporo 33 z’abagore bagaragaje uku gukura kw’amabere nyuma yo gufata urukingo rwa Pfizer, abandi 11 bafashe urwa AstraZeneca, na 4 bafashe urwa Moderna bagaragaje ikibazo nk’iki. Izi raporo zishingira ku buhamya bw’abarwayi, ariko ntizaremezwa n’abaganga. 

 Mu nkuru y’ubushakashatsi iherutse gukorwa na Kaminuza ya Toronto muri Canada, umwana w’imyaka 19 yagaragaje ko amabere ye yakuze kuva ku ngano ya “B cup” kugera kuri “triple G cup”ibipimo byifashishwa hapimwa ingano y'amabere.  Yakuze mu mezi atandatu nyuma yo gufata urukingo rwa Pfizer.

 Abaganga bemeza ko ibi byatewe n’uburyo bita “pseudoangiomatous stromal hyperplasia”(PASH), aho uturemangingo tw’ibere dukura ku buryo budasanzwe.  Nubwo ibi byabaye, abashakashatsi bagaragaje ko nta gihamya ifatika ihamya ko urukingo ari rwo nyirabayazana, ariko basaba gukomeza ubushakashatsi. 

Ibyerekeye uku gukura kw’ibere kandi byigeze gutangazwa mu  2021, ubwo ubushakashatsi bwerekanye ko urukingo rwa Covid-19 rushobora gutera imikurire idasanzwe y’imvubura, ikindi bishobora kuba ari indwara zifata amabere nka kanseri  nk'uko bigaragara mu gusuzuma  ibere hifashishijwe (mammogram) cyangwa ultrasound.