Abapfa babyara bageze kuri 203: U Rwanda ruhagaze he mu kwita ku mubyeyi n’umwana?

Ni icyumweru cyatangiye kuri uyu wa 13 Mutarama kikazasoza kuwa 17 Mutarama 2025. Hateganyijwe ibikorwa bitandukanye birimo guha abana ikinini cy'inzoka no guha inkingo abana bacikanwe n'ibindi bikorwa bigamije guteza imbere ubuzima bw'umwana n'umubyeyi.

Mu Karere ka Gasabo, ahatangirijwe iki cyumweru ku rwego rw’Igihugu, ubuyobozi bwaho bwatangaje ko hazakorwa ibikorwa birimo gukurikirana imikurire y’abana, gutanga ibinini by’inzoka zo mu nda ku bana n’abantu bakuru, gutanga serivisi zo kuboneza urubyaro no gutanga ubutumwa bwo kwirinda Malariya n'izindi ndwara.

Minisitiri w’Uburinganire n’Iterambere ry’Umuryango, Consolée Uwimana, yavuze ko mu Rwanda hatewe intambwe ishimishije ku buzima bw’umubyeyi n’umwana bigaragazwa n’imibare y’igabanuka ry’impfu z’ababyeyi n’abana, asaba ubutafanye mu kurandura igwingira n’inda ziterwa abangavu nka bimwe mu bibazo bikibangamiye umwana n'umubyeyi.

Minisitiri Uwimana yasabye abagore batwite kwitabira serivisi zo kwa muganga, bisuzumisha inshuro 8 nk'uko biteganywa, kubyarira kwa muganga, kwihutira kujya kwa muganga cyangwa ku mujyanama w’ubuzima igihe agize ikibazo, anibutsa ababyeyi gukingiza abana inkingo zose.

Ati: "Turasabwa kurushaho kwita ku mirire y’abana n’ababyeyi batwite tubashakira indyo yuzuye, tubarinda imirire mibi. Ibi byose dusabwa kubikomatanya no kugira isuku mugutegura ibyo turya, gusukura amazi yo kunywa, kugira isuku ku mubiri wacu no mungo zacu."

Mu myaka 24 ishize u Rwanda rwagerageje gushyiraho ingamba zo kugabanya umubare munini w’ababyeyi bapfa babyara n’abana bapfa bavuka, babarirwaga mu 1000 mu babyeyi ibihumbi 100. 

Mu gukomeza kugabanya iyo mibare u Rwanda rufatanyije n’iyo miryango mu gutanga amahugurwa yigiwe ku murimo agahabwa abaganga, ababyaza, abaforomo n’abandi bafite aho bahuriye n’ubuzima bw’umubyeyi n’umwana atwite, hirindwa amakosa yose ashobora guteza ibibazo.

Mu ntangiriro za 2023 abagore batwite bitabiraga gupimisha inda nibura incuro imwe bari 49,5%, mu gihe abitabiraga incuro enye zateganijwe bari 42,7%.

Kugeza ubu imibare igaragaza ko gahunda yo kubyarira kwa muganga biri ku kigero cya 95%, impfu z’ababyeyi bapfa babyara ziri kuri 203 ku bagore ibihumbi ijana ndetse n’abana bapfa bavuka bageze kuri 19 ku bana 1000, abapfa bataruzuza imyaka itanu ni 45 ku 1000 na ho abapfa batamaze umwaka ni 33 ku 1000 bavuka ari bazima.

U Rwanda rwihaye intego ko mu 2030 byibuze izo mpfu z’ababyeyi bapfa babyara zagabanyuka zikagera ku 126 ku bagore ibihumbi 100 babyaye, byaba byiza bakanagera no 70 uretse ko zeru byaba akarusho.

Minisitiri w'Uburinganire n'Iterambere ry'Umuryango yatangije icyumweru cyahariwe kwita ku mubyeyi n'umwana

Harishimirwa ko mu Rwanda imibare y'impfu z'abana n'ababyeyi zagabanyutse