Novak Djokovic yavuze uko yarozwe agaburiwe ibyuma

Mu kiganiro yagiranye na GQ, Djokovic yavuze ko nyuma yo kuva muri Australia yasuzumwe mu gihugu cye maze agasanga afite ikigero cyo hejuru cya plombu n’ibindi byuma biremereye mu mubiri. 

Ati: "Nasobanukiwe ko muri hoteri ya Melbourne nagaburiwe ibiryo byatumye umubiri wanjye wandura cyane. Ibi ntabwo nigeze mbivuga mu ruhame mbere, ariko ibyo byuma biremereye byari mu mubiri wanjye byari ku rwego rwo hejuru cyane.”

Uyu mukinnyi w’imyaka 37 uzwiho gucunga neza indyo ye, yavuze ko ibyo byamusigiye ibikomere bikomeye byo mu mutwe. Ati: "Ubu ngubu, iyo ngeze ku kibuga cy’indege cya Melbourne, numva umutima uhagaze, nkibuka ibihe bikomeye nahuriyemo nabyo muri hoteri yari icumbikiye abasaba ubuhungiro."

Ibibazo bya Djokovic muri Australia byatangiye ubwo yangaga gukingirwa COVID-19, bikaba byaratumye visa ye isubikwa. Icyo gihe, yamaze iminsi afungiwe muri hoteri y’abashaka ubuhungiro, aho yaje no gusubizwa iwabo nyuma y'urubanza rwateje impaka mu isi yose.

Nubwo Minisiteri y’umutekano muri Australia yanze kugira icyo ivuga kuri ibyo birego kubera impamvu z’ubuzima bwite bw’umuntu, Djokovic yavuze ko ibyamubayeho bidashobora kwibagirana mu buzima bwe.

Uyu mukinnyi uzwiho kuba amaze kwegukana ibikombe bikomeye 24 mu mateka ya Tennis, yiteguye kongera guhatana mu irushanwa rya Australian Open ritangira mu cyumweru gitaha, aho ashaka kongera umubare w'ibihembo bye bikomeye bikagera kuri 25.

Abakunzi ba Tennis bategereje kureba niba Djokovic azashobora kwitwara neza nyuma y’ibihe bikomeye yanyuzemo muri Australia, ndetse niba azongera gutwara igikombe mu gihugu cyamusigiye amateka y'ibibazo.

Novac Djokovic yasobanuye ko yarogewe mu biryo aza gusangwa ibyuma mu mubiri