Hakim Sahabo yerekeje mu ikipe nshya itozwa n'uwakiniye Liverpool

Beerschot niyo yabitangaje ku mugoroba wo kuri uyu wa Kane tariki ya 9 Mutarama 2025 ndetse n'iyi kipe ya Standard de Liège yakiniraga imwifuriza amahirwe masa. Aya makipe yombi yemeranyije ko uyu mukinnyi atizwa kuzageza uyu mwaka w'imikino wa 2024/25 urangiye.

Ibi bigiye kuba nyuma y'uko mu mwaka ushize w'imikino ari bwo Hakim Sahabo yazamuwe mu ikipe ya Standard de Liège nkuru akuwe mu bato ndetse akajya akinishwa ku mikino itandukanye aho yanabanzaga mu kibuga.

Gusa kuva uyu mwaka w'imikino utangiye yaje kugira ikibazo cy'imvune binamuviramo gutakaza umwanya wo gukina aho byarangiye yongeye no gusubizwa mu ikipe y'abato.

Beerschot itijwe uyu mukinnyi w'imyaka 19 ukina mu kibuga hagati asatira, ku ikubitiro yari yifuje kumugura gusa biza gukomwa mu nkokora n'uko yafatiwe ibihano byo kutemererwa kugura abakinnyi.

Iyi kipe isanzwe ikina muri shampiyona y'icyiciro cya mbere mu Bubiligi aho iri no ku mwanya wa nyuma kugeza ubu. Umutoza wayo ni Dirk Kuyt wakiniye ikipe ya Liverpool naho nyirayo akaba ari umuherwe ukomoka muri Arabia Saudite witwa Abdullah bin Mossad bin Abdul Aziz Al Saud.

Hakim Sahabo yerekeje muri Standard de Liège mu mpeshyi y'umwaka wa 2023 asinya amasezerano y'imyaka 3 avuye mu ikipe ya Lille y'abato.

Hakim Sahabo yatijwe mu ikipe ya Beerschot