Perezida Kagame yavuze impamvu atitabiriye inama yari kumuhuza na Félix Tshisekedi

Ku wa 15 Ukuboza 2024, Perezida w'u Rwanda Paul Kagame na Perezida Félix Tshisekedi wa Repubulika ya Demokarasi ya Congo hamwe na Perezida w'Angola João Lourenço bari guhurira I Luanda mu nama igamije gushaka uko mu Burasirazuba bwa DRC hagaruka amahoro.

Binyuze ku mbuga nkoranyambaza z’ibiro bya Perezida wa DRC, byatangaje ko Perezida w’u Rwanda yanze kwitabira inama mu gihe Perezida Félix Tshisekedi we yari yageze i Luanda aho bari guhurira bakaganira nk’abayobozi b’ibihugu bitatu bagashakira hamwe umuti w’ibi bibazo.

Icyo gihe, Ibiro bya Perezida muri DRC byahise bitangaza ko impamvu Perezida Kagame atitabiye ari uko u Rwanda rwahise ruzana indi ngingo yo kuganira na M23 kandi ibyo bitari mu biganiro bagiranye.

Minisitiri w’Ububanyi n’Amahanga n’Ubutwererane, Olivier Nduhungirehe wanitabiriye ibiganiro byo ku rwego rwa ba Minisitiri, hagamijwe gushaka umuti w’intambara imaze imyaka ica ibintu mu Burasirazuba bwa RDC no guhosha umwuka mubi hagati y’u Rwanda na RDC, yagaragaje ko ibyatangajwe n’iki gihugu ari ibinyoma byambaye ubusa kandi ukuri kwabyo kwigaragaza.

Minisitiri Nduhungirehe abinyujije kuri X yagaragaje ko ibyo itangazo rya Perezidansi ya RDC rivuga ari ikinyoma cyambaye ubusa kuko “ikibazo cya M23 cyatangiye kuganirwaho mu biganiro bya Luanda kitazamuwe n’u Rwanda, ahubwo bitangijwe n’umuhuza [Angola] wari wateguye imbanzirizamushinga y’amasezerano y’amahoro akayagaragariza abakuru b’ibihugu by’u Rwanda na RDC ku wa 11 na 12 Kanama 2024.”

Akomeza ati “Mu nama ya kane yo ku rwego rwa ba Minisitiri yabaye ku wa 14 Nzeri 2024 i Luanda, u Rwanda rwagaragaje ko rwifuza ko habaho ibiganiro bya politike hagati ya RDC n’umutwe wa M23, hagamijwe gushaka umuti urambye w’intambara, kandi icyo cyifuzo cyanditswe gutyo mu myanzuro y’iyo nama.”

Mu kiganiro n’itangazamakuru cyabaye kuri uyu wa Gatatu, Perezida Kagame yavuze ko iki kibazo cyo muri DRC cyarangira ariko abari mu bikorwa by’ubuhuza batitaye ku kurangiza ikibazo ahubwo bo bashyize imbere kuvuga ngo 'turi mu nzira'.

Kagame yagize ati ”Baravuga ngo ariko ntabwo wigeze ujya i Luanda. Nkavuga nti byagenze bite aho nagiye hose? Byageze aho numva naniwe. Twagize inama i Nairobi, nari mpari, i Luanda nari mpari, aho ari ho hose habereye inama zo gucyemura iki kibazo, u Rwanda rwari ruhari.

No kugeza ubu tuvugana, icy’ibanze si ugucyemura no kurangiza ikibazo ahubwo icy’ibanze ni ukwitabira no kwifotoza kugira ngo bavuge ngo yego yari i Luanda. Naje kubona ko kujyayo no kutajyayo byose ari kimwe kuko batava imuzi n’imuzingo ikibazo nyamukuru.”

Perezida Kagame yagarutse ku kiganiro yagiranye na Perezida w'u Bufaransa i New York muri Amerika ubwo yamusabaga ko yabagereza ubutumwa kuri M23 bakava i Bunagana hanyuma amubwira mu kinyabupfura ko yamutangira ubutumwa ariko akibaza aho bazajya nibaramuka bavuye mu  gihugu cyabo.

Perezida Kagame yavuze ko yaje akora ibishoboka byose ageza ubwo butumwa kuri M23 ariko igihe bari bagiye kuva mu gace ka Bunangana, M23 yahise iterwa kandi bari bemeye ko bava muri icyo gice kugira ngo inzira y’amahoro ikomeze.

Ibi byose ni byo Perezida Kagame ashingiraho avuga ko ikibazo cy’umutekano mucye muri DRC cyagacyemutse ariko abafite ubushobozi bwo kugikemura badafite ubushake bwo kugikemura ahubwo babimwamwanyiriza mu kubigereka ku Rwanda.