Nyayo Stadium yo muri Kenya yemerewe kwakira imikino ya CHAN 2024

Iyi nkuru nziza yamenyekanye nyuma y’igenzura ryimbitse ryakozwe n’itsinda rya CAF ryari riyobowe na Samson Adamu, umuyobozi ushinzwe amarushanwa. Iri genzura ryakozwe ku wa Gatatu, tariki ya 8 Mutarama 2025.

Uretse Nyayo Stadium, CAF yanasuye ibindi bibuga bitandukanye muri Kenya birimo Kirigiti Stadium mu gace ka Kiambu, Police Sacco Stadium, hamwe na Ulinzi Sports Complex. Ibibuga bizakoreshwa nk’ahantu h’imyitozo ku makipe azitabira iri rushanwa.

Kasarani Stadium, kimwe mu bibuga bikomeye muri Kenya, irimo kuvugururwa ku buryo bukomeye. Abakora imirimo yo kuvugurura bakora amasaha 24/24 kugira ngo iki kibuga kizabe cyiteguye kwakira imikino ya nyuma ya CHAN 2024. 

Leta ya Kenya kandi yatangiye kubaka ikibuga gishya cyiswe Talanta City, hagamijwe kongera ubushobozi bwo kwakira amarushanwa mpuzamahanga.

Mu rwego rwo kuzamura urwego rw’ibibuga byayo, Kenya yakoze ivugurura rikomeye. Nyayo Stadium imaze gushyirwaho amatara mashya yo kumurikira ikibuga (floodlights), aho amwe muri yo yamaze gushyirwa ku gisenge cy’ikibuga. Intebe nshya zifite ibyicaro bifite umugongo (back rests) ziri gushyirwa ahasigaye mu duce two hejuru no hepfo.

Ikindi cyakozwe ni ukongerera ubushobozi ubwiherero rusange bw’ikibuga, ubu bukaba bwiteguye kwakira abafana bazitabira iri rushanwa.

CHAN 2024 ni irushanwa rikomeye rigenewe gusa abakinnyi bakinira imbere mu bihugu byabo. Kenya izakira iri rushanwa ifatanyije na Tanzania na Uganda. Uretse ibibuga bya Kenya byari bigifite ibibazo by’ubuziranenge, ibibuga byo muri Tanzania na Uganda byamaze kwemezwa na CAF mbere y’igihe.

Itombora y’amatsinda ya CHAN 2024 iteganyijwe kubera muri Kenya ku itariki ya 15 Mutarama 2025. Ibi bigaragaza ko Kenya irimo kwihutisha imirimo yo kuvugurura ibikorwaremezo kugira ngo itegure neza iri rushanwa rikomeye kuri Afurika.

Kwakira CHAN 2024 bizafasha Kenya kwerekana ubushobozi bwayo mu gutegura amarushanwa akomeye, ndetse binatange amahirwe yo kuzamura urwego rw’umupira w’amaguru mu gihugu. Mu minsi ishyize u Rwanda narwo rwisanze mu makipe azitabira CHAN 2024 izabera muri Kenya, Uganda na Tanzania.

Nyayo Stadium yo muri Kenya yamaze kwemererwa kwakira imikino ya CHAN