Dani Olmo na Pau Victor bemerewe gukinira Barcelona

Aya makuru y’ibyishimo aje nyuma y’amananiza y’amategeko mu Ishyirahamwe ry’Umupira w’Amaguru muri Esipanye (RFEF) na La Liga aho Barcelona yari yarabwiwe ko hari ibyo itujuje biyemerera gukinisha Dani Olmo na Pau Victor.

Dani Olmo ufite imyaka 26, na Pau Victor, w’imyaka 23, bombi bari baguzwe muri iyi mpeshyi. Icyakora, kubera ibibazo bya FC Barcelona byo kutuzuza ibisabwa n’amategeko ya La Liga ku bijyanye n’ibirarane by’imishahara (wage cap), aba bakinnyi bari bandikishijwe mu gice cya mbere cy’igihe cya shampiyona gusa. Ubwo Barcelona yageragezaga kubandikisha ngo bazayifashe mu gice cya kabiri, La Liga na RFEF byahise byanga.

FC Barcelona yari yajuririye iki cyemezo maze kuri uyu wa Gatatu CSD itangaza icyemezo cy’agateganyo cyo guha aba bakinnyi uburenganzira bwo gukina. CSD yasobanuye ko iki cyemezo kizakomeza kubahirizwa kugeza hafashwe umwanzuro wa burundu  kuri iki kibazo La Liga na RFEF bishingirabo bibuza Barcelona kwandikisha abakinnyi bashya.

CSD yatangaje mu itangazo ryayo iti "Iki cyemezo cya CSD gisubika icyemezo cya La Liga na RFEF, kigahesha aba bakinnyi uburenganzira bwo gukina kugeza urubanza rurangiye.

La Liga yavuze ko itigeze ihabwa umwanya wo gutanga ibitekerezo ku bujurire bwa Barcelona kandi ikomeje kugenzura iki cyemezo cya CSD. Mu itangazo La Liga yashyize ahagaragara, yagize iti: “Tuzasuzuma iki cyemezo twitonze kandi turebe niba hari uburyo bwo kukijuririra.”

Mu rwego rwo gukemura ibibazo by’ubushobozi bw’amafaranga, FC Barcelona yagurishije amatike ya VIP ku kibuga cyabo gishya kiri kubakwa, bikavugwa ko binjije miliyoni 100 z’ama-euro. Icyakora, inyandiko z’ibyakozwe zatinze gutangwa, bikarushaho gushyira FC Barcelona mu bibazo.

N’ubwo aba bakinnyi batabashije gukina umukino wa 1/2 cy’igikombe cya Spanish Supercopa ubwo Barcelona yatsindaga Athletic Club ibitego 2-0, ubu bazaba bemerewe gukina umukino wa nyuma uzabahuza na Real Madrid cyangwa Mallorca ku cyumweru.

Kuba Dani Olmo na Pau Victor bemerewe gukina ni intambwe ikomeye kuri FC Barcelona, ikipe ikomeje guhangana n’ibibazo by’imari n’amategeko.

FC Barcelona yakomorewe kwandikisha Dani Olmo na Pau Victor mu gice cya kabiri cya shampiyona ya Espagne