Rutahizamu Musa Esenu yerekeje muri Vision FC

Uyu mukinnyi witezweho kuzahura ikipe ya Vision FC, yasinyiye iyi kipe ku mugoroba wo ku wa Gatatu tariki ya 8 Mutarama 2025.

Esenu yari asanzwe azwi mu makipe akomeye nka Rayon Sports, aho yerekanye ubuhanga bwe mu busatirizi. Yaje gutandukana na Rayon Sports yerekeza muri Bull FC muri Mutarama 2024, ariko ntiyahatinze kubera ko yari yasinyiye indi kipe yo muri Iraq.

Vision FC, ikipe Esenu agiyemo, iri mu bihe bitoroshye muri shampiyona y’u Rwanda. Nyuma y’imikino ibanza ya shampiyona y’u Rwanda, iri ku mwanya wa 15 n’amanota 12, ikaba mu murongo utukura.

Mu gihe shampiyona yarangira gutya, iyi kipe yazasubira mu cyiciro cya kabiri. Kubera ibi, Musa Esenu yitezweho kuzamura urwego rw’iyi kipe no kuyifasha kuguma mu cyiciro cya mbere.

Kuri uyu wa Kane tariki ya 9 Mutarama 2025, Musa Esenu yahise atangira imyitozo hamwe n’abakinnyi ba Vision FC kuri Stade ya Mumena. Ibi byerekana ko uyu mukinnyi afite intego yo gutanga umusaruro ku buryo bwihuse, agafasha iyi kipe kwitwara neza mu mikino isigaye.

Nk’umukinnyi w’inararibonye, Esenu afite amahirwe yo gutanga umusaruro mu busatirizi bwa Vision FC afatanyije na Bagenzi be barimo Cyubahiro Idarus, Twizerimana Onesme ndetse n’abandi, ikipe ikeneye amanota kugira ngo ikomeze kuguma mu cyiciro cya mbere.