Bite by'imvune ya Muhire Kevin muri Rayon Sports?

Ku Cyumweru tariki ya 5 Mutarama 2025 Saa Kumi n'Ebyiri ni bwo ikipe ya Rayon Sports yatsindaga Police FC ibitego 2-0 mu mukino wo ku munsi wa 14 wa shampiyona y'icyiciro cya mbere mu Rwanda wabereye muri Kigali Pelé Stadium.

Ubwo uyu mukino wari ugeze ku munota wa 12 , Kapiteni wa Rayon Sports, Muhire Kevin yagonganye na myugariro wa Police FC,Issah Yakubu gusa yitabwaho n'abaganga. Nyuma y'iminota itatu gusa yongeye kwicara hasi ndetse birangira anavuye mu kibuga asimbuzwa Iraguha Hadji. 

Bijyanye n'uko byagaragaraga, benshi baketse ko uyu mukinnyi ashobora kuba yababaye cyane bikaba bizanamuviramo kumara hanze y'ikibuga igihe kirekire adakina ariko Rayon Sports yavuze ko uyu mukinnyi arasubukura imyitozo mu gihe cya vuba nyuma y'uko akorewe isuzuma.

Yagize ikibazo cy'imitsi mu ivi rye ry'iburyo ndetse ryaranabyimbye. Ubwo bivuze ko Muhire Kevin azasiba umukino iyi kipe yambara Ubururu n'Umweru ifitanye na Mukura VS kuri uyu wa wa Gatandatu tariki 11 Mutarama 2025 Saa Kumi muri Stade ya Huye.

Kugeza ubu Rayon Sports iracyayoboye urutonde rwa shampiyona n'amanota 36.

Muhire Kevin wagize ikibazo cy'imvune ku mukino na Police FC ntabwo azamara hanze y'ikibuga igihe kirekire 

Kuwa Mbere Muhire Kevin yagiye mu myitozo ya Rayon Sports gusa ntabwo yigeze ayikora