CHAN : Amafaranga ahabwa ikipe ikipe yegukanye igikombe yongerewe

Ibi byatangajwe na Perezida wa CAF,Dr Patrice Motsepe ku munsi w'ejo ku wa Kabiri tariki ya 8 Mutarama 2025. 

Dr Patrice Motsepe yavuze ko bishimiye irushanwa rya CHAN 2024 ndetse anavuga ko bongeye amafaranga y'igihembo gihabwa uwegukanye igikombe ndetse  ko n'amafaranga y'ibihembo bitangwa muri rusange yongerewe.

Ati"Twishimiye irushanwa rya CHAN rigiye kubera muri Kenya, Tanzaniya na Uganda 2024 kandi twongereye cyane amafaranga yigihembo cy'uwatsinze agera kuri miliyoni 3.5 z'Amadorali akaba yiyongereyeho 75%. 

Muri rusange hongewe  kandi amafaranga y'ibihembo bizatangwa muri CHAN izabera muri Kenya, Tanzaniya na Uganda 2024 agera kuri Miliyoni 10.4 z'Amadorali bikaba byiyongereyeho 32%".  

Yavuze ko CHAN ari irushanwa ry'ingirakamaro mu guteza imbere abakinnyi b'umupira w'amaguru bakomoka muri Afurika.

Yagize ati "CHAN ni irushanwa ry'ingirakamaro mu guteza imbere no kuzamuka kw'abakinnyi b'umupira w'amaguru bakomoka muri Afurika ndetse n'abakinnyi bakiri bato bafite impano kandi bizagira uruhare runini mu kurushanwa ku mupira w'amaguru wa Afrika ku Isi yose n'amarushanwa ya CAF".

Yakomeje agira ati"Iri rushanwa ni bumwe mu buryo bwacu bwo gushora imari mu mupira w'amaguru wa Afurika no kugira ngo ugaragare no gukurura abakunzi b'umupira w'amaguru, abareba televiziyo, abaterankunga, abafatanyabikorwa ndetse n'abandi fatanyabikorwa muri Afurika ndetse no ku Isi yose."

CHAN ya 2024 izabera muri Kenya , Tanzania na Uganda izatangira gukinwa ku wa Gatandatu tariki ya 1 Gashyantare kuzageza ku wa Gatanu tariki ya 28.

Kugeza ubu ibihugu byamaze kubona itike yo kuzayikina ni Kenya, Tanzania, Uganda, Morocco, Guinea, Senegal, Mauritania, Niger, Burkina Faso, Nigeria, Central African Republic, Democratic Republic of Congo, Congo-Brazaville, Sudani, Zambia, Angola na Madagascar.

Ni mu gihe ibindi bihugu bibiri bisigaye birimo n'u Rwanda bizatangazwa vuba.