Vinicius yahagaritswe imikino 2, Real Madrid icibwa amafaranga

Mu Cyumweru gishize ni bwo ikipe ya Valencia yari yakiriye Real Madrid kuri Estadio Mestalla mu mukino w'ikirarane cya shampiyona yo muri Espagne nyuma yuko wari warasubitswe kubera ibiza.

Uyu mukino warangiye Real Madrid itsinze ibitego 2 -1 bigoranye dore ko byasabye iminota ya nyuma. Ni ibitego byatsinzwe na Luka Modric ku munota wa 85 ahawe umupira na Jude Bellingham ndetse na Jude Bellingham ku munota wa 90+5 mu gihe icya Valencia cyo cyatsinzwe na Hugo Duro ku munota wa 27.

Ikipe ya Real Madrid yarangije uyu mukino ifite abakinnyi 10 mu kibuga nyuma yuko Vinicius Junior yari yabonye ikarita y'umutuku.

Uyu mukinnyi bigeze ku munota wa 79, umunyezamu wa Valencia, Stole Dimitrievski yamukoze mu bitugu nyuma y'uko yari yikubise hasi mu rubuga rw'amahina undi nawe ahagurukana umujinya amusunika bituma umusifuzi amuha ikarita y'umutuku.

Umutoza wa Real Madrid, Carlo Ancelotti yavuze ko umukinnyi we atari akwiye guhabwa ikarita y'umutuku bityo ko bazayijuririra.  

Nyuma y'ibi akanama gashinzwe imyitwarire mu ishyirahamwe ry'umupira w'amaguru muri Espagne karasuzumye gasanga koko uyu mukinnyi yari akwiriye ikarita y'umutuku none kuwa Kabiri ni mugoroba katangaje ko uyu mukinnyi azasiba imikino 2 ya shampiyona.

Icyongeyeho kandi Real Madrid yaciwe amafaranga y'amande angana n'Amayero 700 ndetse n'uyu mukinnyi nawe acibwa amande agera ku Mayero 600.

Imikino 2 uyu mukinnyi azasiba ni uwa Las Palmas mu rugo ndetse n'uwa Real Valladolid hanze. 

Kuva uyu mwaka w'imikino watangira, Vinicius Junior amaze gukinira Real Madrid imikino 21, akaba yaratsinzemo ibitego 13 ndetse akaba yaratanzemo imipira 9 yabivuyemo.

Ikosa Vinicius Junior yakoreye umunyezamu wa Valencia ni ryo ryamuhesheje ikarita y'umutuku 

Vinicius azasiba imikino ibiri kubera ikarita y'umutuku yahawe