Amavubi yatumiwe muri Mapinduzi Cup mu rwego rwo kwitegura CHAN

Umunyamabanga mukuru w’ishyirahamwe ry’umupira w’amaguru mu Rwanda (FERWAFA), Kalisa Adolphe uzwi nka ‘Camarade’, yemeje ko u Rwanda rwakiriye ubutumire ariko ko hagitegerejwe kumenya niba koko ruzakina CHAN 2024.

Ku Cyumweru, Impuzamashyirahamwe y’Umupira w’Amaguru muri Afurika (CAF) yashyize hanze urutonde rw’amakipe yamaze kubona itike ya CHAN 2024 izabera mu bihugu bitatu aribyo Tanzania, Kenya, na Uganda. Ku rutonde rwagaragayemo n’u Rwanda, ariko nyuma byaje kugaragara ko hari habayemo kwibeshya, maze CAF ihita isohora urundi rutonde rutagaragaza Amavubi.

Nyuma y’ibi, ubwo imikino yose yo gushaka itike ya CHAN 2024 yari irangiye, ibinyamakuru bitandukanye n’abanyamakuru b’umupira w’amaguru bongeye gushyira u Rwanda mu makipe yabonye itike.

Mu makipe amaze kwemezwa harimo: Angola, Burkina Faso, Central African Republic, Congo, DR Congo, Guinea, Mauritania, Morocco, Madagascar, Niger, Nigeria, Senegal, Sudan, na Zambia, ukongeraho Tanzania, Kenya, na Uganda nk’ibihugu by’izakira.

Bivugwa ko u Rwanda rufite amahirwe yo kubona itike ya CHAN 2024 bitewe n’uko hari amakipe yanze kwitabira amajonjora. 

Kuba Amavubi yarabaye aya kabiri mu mikino y’Amajonjora ya CECAFA inyuma ya Sudani byayihesha amahirwe yo kwitabira iri rushanwa, Sudani nayo ikazahabwa itike.

Ku rundi ruhande, FERWAFA ntiragira icyo itangaza ku byerekeye iyi tike. Gusa, iramutse yemejwe, iri rushanwa rya Mapinduzi Cup ryaba amahirwe akomeye yo kwitegura neza CHAN 2024.

Ikipe y'igihugu Amavubi itarizera niba izitabira imikino ya CHAN, yatumiwe mu mikino yo kuyitegura