Ubusobanuro, inkomoko n’imiterere by’abitwa Eugene, Felix na Betty

Uyu munsi, InyaRwanda yahisemo kukugerazo ibisobanuro, inkomoko n’ibiranga abitwa amazina arimo Eugene, Felix na Betty.

1.     Eugene

Eugene ni izina rifite inkomoko mu Kigereki ku izina Eugenios rikaba rihabwa umwana w’umuhungu, ni izina risobanura ngo “uwavutse neza” (well born) naho mu Kilatini ni Eugenius.

Umukobwa bamwita Eugenia cyangwa Eugénie naho umuhungu akitwa Eugene.

Bimwe mu biranga ba Eugene:

Eugene uzasanga akenshi ari umuntu udakunda ibintu bya hutihuti cyangwa gukora imirimo imuvuna.

Aba ashaka gukora yitonze, buri kintu akagikora yakirangiza agatangira ikindi nta gitutu ashyizweho.

Ni umuhanga, ashobora kwiga akagera kure ariko iyo bitangiye kugorana abivamo ntaba ashaka kuvunika.

Ni umuntu ukunda gufasha cyangwa gukorera abandi agashoramo amafaranga ye, ubwenge bwe, n’imbaraga hamwe no guhanga udushya.

Kubera umutima mwiza, no guhora yishimye usanga afite inshuti nyinshi cyane kandi niyo arakaye ntabwo bitinda, bimara akanya gato cyane.

Ni umuntu utihanganira ubukene cyangwa imyanzuro imutunguye ariko ni umunyembaraga kandi agira umwete

Usanga Eugene ari umuntu w’umutima mwiza, kandi ukunda gutanga nubwo nta yindi nyugu yindi aba abitegerejemo.

Ni umuntu utagira uburyo buhamye bwo gucunga amafaranga, ibintu byo kuzigama biramugora cyane ayakoresha uko yiboneye.

Kumva ko yitwa Eugene bituma akunda umuziki, ubugeni akanakunda ibintu byose bijyanye n’imyidagaduro.

Eugene ni umuntu w’umunyamahirwe ibintu byose yerekejemo ukuboko biramuhira.

2.     Felix

Felix ni izina rihabwa umwana w’umuhungu rifite inkomoko mu Kilatini ku izina Felicis rikaba risobanura ibyishimo, umunyamahirwe n’uburumbuke.

Bamwe bandika Phelix, Feliu, Félix, Felice, Feliks.

Bimwe mu biranga ba Felix:

Felix ni umuntu ukundwa,ushimishwa no kuba hamwe n’abandi.

Ni umuntu udashabutse; ntabwo ibintu bye abyihutisha ariko mu bwitonzi bwe abikora neza.

Ni umuntu ugira amarangamutima hafi kandi usanga akunda kugendana n’igitsina gore, abiyumvamo, hari abavuga ko usanga ari yo mpamvu atihuta mu byo akora.

Ni umunyabuntu, agira ibikorwa by’ubumuntu no kwitangira abandi no gushashikariza abandi kubikora.

Muri kamere ye Felix aba yifitemo gukunda umuziki, biba byiza iyo abitojwe hakiri kare kuko usanga akura abikora neza.

Akunda ibyo gutembera, ibyo kuryoshya mu rukundo ndetse kwigenga agakora ibyo yumva yisanzuyemo atari itegeko.

Iyo bigeze ku guhitamo icyo azakora, Felix ahitamo umwuga w’ababyeyi cyangwa agahitamo imirimo rusange nko kwigisha, kuba umufashamyumvire , umujyanama n’ibindi.

Iyo akiri umwana aba yumva vuba ku buryo kumwigisha bidatinda kandi abifata vuba cyane.

Gusa ubumenyi bwo mu ishuri bugirwamo uruhare n’umuryango we kuko baba bagomba kumushishikariza gukora imikoro yahawe kuko nubwo afata mu mutwe ariko agira ubunebwe.

3.     Betty

Betty ni izina rihabwa umwana w’umukobwa rifite inkomoko mu Giheburayi ku izina Elisheva cyangwa Elisabeth, risobanura uweguriwe Imana. Hari naho risobanura ko Imana ituganye.

Mu Gifaransa bamwita Beatrice, mu Cyongereza ho bandika Betty.

Bimwe mu biranga ba Betty:

Betty aba ari umukobwa cyangwa umugore ugaragaza amarangamutima aho ava akagera.

Ni umuntu udahisha uko ateye kuko amarangamutima ye ahita akwereka uko yaramutse binyuze mu buryo akwitwaraho niba ari neza cyangwa nabi.

Iyo akwishimiye urabibona kandi niyo akwanze ashobora no kukubona agahungabana mu ruhame.

Bitewe n’ukuntu ateye, ashobora gukomereka vuba mu buzima bwe niyo waba wumva umubwiye ikintu cyoroheje.

Iyo abaye umubyeyi, aba ari umuntu w’umunyampuhwe cyane udashobora kuyoberwa inshingano ze mu rugo cyangwa kumenya icyo abana bakeneye.

Akunda gukora ibintu bituma agaragaza amarangamutima ye nko kuba umuririmbyi,umucuranzi, umukinnyi w’ikinamico cyangwa filimi n’ibindi.

Agira ubumuntu, ni umunyampuhwe ukunda gufashanya no kwita ku bandi.

Agira umwete kandi arasetsa gusa ntago yikubira ngo yumve ashishikajwe n’ibye gusa.

Ni umuntu ufata vuba mu mutwe, azi guhanga udushya kandi azi gucyemura ibibazo mu magururu mashya.