APR WBBC yatahanye umwanya wa Gatatu mu mikino nyafurika

Ferroviário Maputo yegukanye iri rushanwa nyuma yo gutsinda Al Ahly yo mu Misiri ku mukino wa nyuma ku manota 81-72. Iyi ni inshuro ya gatatu iyi kipe itwaye iri rushanwa nyuma yo kuryegukana mu 2018 na 2019. Gutsinda Al Ahly, ikipe yari ikomeye cyane muri iyi mikino, byayihesheje amahirwe yo kongera kwandika amateka.

APR WBBC, ihagarariye u Rwanda nayo yakoze amateka akomeye aho yatsinze ASC Ville de Dakar ku manota 96-94, maze yegukana umwanya wa Gatatu ihabwa umudali wa Bronze. 

Uyu mudali wa bronze ni uwa mbere APR WBBC ibonye mu mateka yayo muri iri rushanwa. Mu myaka yashize, APR WBBC yabaye iya nyuma mu 2022, naho mu 2023 ntiyitabiriye. Iyi ntsinzi yo muri 2024 ni icyerekana gutera intambwe gukomeye kw’iyi kipe y’Ingabo z’u Rwanda.

REG WBBC nayo yari ihagarariye u Rwanda ariko ntiyitwaye neza muri uyu mwaka. Nyuma yo kuza ku mwanya wa kane mu mwaka ushize wa 2023, REG WBBC yasoreje ku mwanya wa gatandatu muri uyu mwaka, nyuma yo gutsindwa na Friends of Basketball Association yo muri Côte d’Ivoire ku manota 55-47.

Shaina Pellington, Umunya-Canada ukinira APR WBBC, yigaragaje nk’umukinnyi w’igitangaza muri iri rushanwa. Yabaye umwe mu bakinnyi batanu beza kurusha abandi, ndetse aba uwaritsinzemo amanota menshi kurusha abandi bose.

Iri rushanwa ryasize isomo rikomeye ku makipe y’u Rwanda, by’umwihariko APR WBBC, ikomeje kwiyubaka no guhesha ishema igihugu mu ruhando nyafurika.

APR WBBC yegukanye umwanya wa gatatu mu mikino nyafurika yaberaga muri Senegal

Shania wa APR WBBC niwe watsinze amanota menshi mu irushanwa