Real Madrid irashinja umusifuzi kuyibuza intsinzi

Ku munsi w'ejo ku wa Gatandatu Saa Yine z'ijoro nibwo ikipe ya Rayo Vallecano yari yakiriye Real Madrid kuri Campo de Futbol de Vallecas mu mukino wo ku munsi wa 17 wa shampiyona ya Espagne. 

Uyu mukino warangiye amakipe yombi anganya ibitego 3-3 aho Rayo Vallecano yatsindiwe na Unai Lopez ku munota wa 4,Abdul Mumin ku munota wa 36 ndetse na Isi Palazon ku munota wa 64 mu gihe Real Madrid yo yatsindiwe na Federico Valverde ku munota wa 39,Jude Bellingham ku munota wa 45 ndetse na Rodrigo ku munota wa 56.

Nyuma y'uyu mukino ikipe ya Real Madrid ibinyujije ku rubuga yakoze inkuru igaruka k'uko umukino wagenze,ivugamo ko umusifuzi wasifuye uyu mukino witwa Juan Martínez Munuera ariwe wababujije kubona amanota 3.

Muri iyi nkuru iyi kipe yavuze ko Vinicius Junior yategewe mu rubuga rw'amahina ariko umusifuzi ntatange penaLiti kandi yariyo. Yagize iti"Ku munota wa 75 habayeho ibintu bitavugwaho rumwe muri uyu mukino,Vinicious Junior yatezwe na Mumin ari mu rubuga rw'amahina ariko Martínez Munuera ntabwo yatanze penaLiti, nibura nta nubwo umusifuzi wa VAR González Fuertes yigeze anamuburira".

Usibye ibi kandi n'umutoza wa Real Madrid, Carlo Ancelotti mu kuganira n'itangazamakuru nyuma y'umukino,yagaragaje ko iyi yari penaliti mu buryo bugaragara.

Kugeza ubu iyi kipe iri ku mwanya wa 2 n'amanota 36 aho irushwa inota rimwe na FC Barcelona ya mbere,ikaba izasubira mu kibuga ku wa Kane w'icyumweru gitaha ikina na Pachuca ku mukino wa nyuma wa FIFA Intercontinental Cup.

Real Madrid yerekanye ko umusifuzi atatanze penaliti ku ikosa ryakorewe Vinicius Junior kandi yariyo