Perezida wa Rayon Sports yahakanye ibyo kugira ubwoba ko akagozi kazacika-VIDEO

Ku munsi w'ejo ku wa Gatandatu Saa Kumi n'Ebyiri z'umugoroba muri Kigali Pelé Stadium ikipe ya Rayon Sports yatsindaga AS Kigali ibitego 3-1.

Ibitego bya Murera byatsinzwe na Fall Ngagne ku munota wa 50 n'uwa 90+1 ndetse na Adama Bagayogo ku munota wa 49 mu gihe icya AS Kigali cyo cyatsinzwe na Iyabivuze Osee kuri penaliti ku munota wa 79.

Nyuma y'uyu mukino, Perezida wa Rayon Sports, Twagirayezu Thaddée yavuze ko bishimye gusa ko bitagomba kugarukira aho ahubwo ko bagomba gukomeza.

Ati" Turishimye rwose ariko nubwo twishimye ntabwo tugomba kugarukira aha ngaha tugomba gukomeza uyu mujyo dufite tugakomeza tugatsinda. Tugiye mu kiruhuko cy'ibyumweru bibiri,tugiye kongera twitegure tugire ibyo dutunganya, ubundi dukomeze gutsinda".

Yavuze ko atavuga ko batwaye igikombe kuko hakiri kare gusa ko bari gukorera hamwe, intego ari imwe.

Ati"Haracyari kare ariko twebwe icyo dushaka ni igikombe. Komite, abakinnyi,abatoza,twese dushyize hamwe turi gukorera hamwe,twese intego ni imwe gusa,umwe ni umwe nta kibazo". 

Thaddée yavuze ko uyu mukino wa AS Kigali utari umutego ndetse anavuga ko nta bwoba bafite ko akagozi kazacika.

Ati" Oya ntabwo umukino uba umutego,twaje gukina twatunganyije ibyo tugomba gutunganya. Twari twaje gukina kugira ngo dutsinde nta mutego wari uhari.

Nta bwoba dufite kuko ibyo turimo gukora turabitegura kandi tubitegura mu buryo bwiza rero ntabwo twakagombye kugira ubwoba ubu ngubu. Nta bwoba y'uko akagozi kazacika,nta bwoba ko ubushobozi buzashira".

Kugeza ubu ikipe ya Rayon Sports niyo iyoboye urutonde rwa shampiyona n'amanota 33 aho irusha amanota 8 ikipe ya APR FC ya kabiri gusa yo ikaba igifite umukino w'ikirarane na Musanze FC.