MTN na UNICEF batangiye ubufatanye bugamije kurinda umutekano w'abana kuri interineti – AMAFOTO

Ni amasezerano yiswe ‘Memorandum of Understanding (MOU),’ agamije guteza imbere uburenganzira bw'abana, uko bakoresha ikoranabuhanga no gukemura ikibazo cy'imirire mibi.

MTN Rwanda, yiyemeje gushora agera kuri 34,625,000 Frw muri ubu bushakashatsi, mu rwego rwo gusuzuma ingaruka abana bahura na zo kuri interineti zirimo ihohoterwa rikorewe ku ikoranabuhanga, urugomo no gukoreshwa.

Ikindi kigamijwe muri ubu bushakashatsi, ni ugufasha ababyeyi gucengeza imyitwarire myiza yo kuri interineti mu bana babo. Hitezwe ko ibizava muri ubu bushakashatsi bizagira uruhare runini mu kwita ku mutekano w'ikoranabuhanga w'abana barenga 500,000 bakoresha interineti mu Rwanda.

Umuyobozi Mukuru wa MTN Rwanda, Mapula Bodibe yagaragaje uko bakiriye ubu bufatanye, ati: “Dutewe ishema no gukorana na UNICEF Rwanda kuri gahunda ihura neza n’indangagaciro zacu muri MTN Rwanda. 

Ubu bufatanye bushyigikiye gahunda yacu y’ubukangurambaga bwa ‘Help Children Be Children’ yatangijwe mu 2022, igaragaza ko twiyemeje guharanira umutekano w’abana w’ikoranabuhanga, mu gihe abashobora gukoresha interneti bagenda biyongera mu gihugu hose.”

Ni mu gihe Umuyobozi wa UNICEF mu Rwanda, Julianna Lindsey, yavuze ko ubu bufatanye bugaragaza ko UNICEF yonyine idashobora gukemura ibibazo biri mu burezi, mu mirire ndetse no mu rugendo rwo kurengera abana. Yongeyeho ko kugira ngo ibi bibazo byose bikemuke burundu, hakenewe n’inkunga ya Leta, ndetse n’iy’abikorera by’umwihariko.

Ati: “Nejejwe no kubona MTN iteye iya mbere mu kwerekana uko umutungo w’ibigo binyuranye ushobora gukoreshwa mu kuzana impinduka za nyazo mu mibereho y’abana aho baherereye mu gihugu hose.”

Si ubushakashatsi gusa, kuko mu masezerano MTN na UNICEF basinye, harimo no gushyigikira ubukangurambaga bwiswe 'One Egg per Child,' bugamije kurandura ikibazo cy'imirire mibi mu bana, aho MTN izafasha muri iyi gahunda yo gutanga amagi ku bana buri munsi.

Biteganyijwe ko abana 1,000 ari bo bazungukira muri iyi gahunda by'umwihariko abo mu duce tw'Akarere ka Gicumbi.

MTN kandi, yiyemeje gukuraho ikiguzi cyose cya internieti ku mbuga zinyuranye zinyuzwaho amasomo, zirimo urwitwa 'Rwanda Education Board (REB) e-learning resources,' iza UNICEF zirimo Itetero, Ingazi n'izindi. Ni ukuvuga ko umwana, umurezi cyangwa se umubyeyi azajya ajya kuri rumwe muri izi mbuga ku buntu.

Binyuze muri uku koroherezwa, byitezwe ko abana barenga miliyoni imwe n'igice, abarimu ndetse n'abashinzwe kwita ku bana ari bo bazabyungukiramo.  

MTN Rwanda na UNICEF Rwanda byasinyanye amasezerano y'ubufatanye agamije imibereho myiza y'abana by'umwihariko abisanga mu isi y'ikoranabuhanga

Ni amasezerano yashyizweho umukono n'Umuyobozi wa MTN Rwanda, Mapula Bodibe n'uwa UNICEF Rwanda, Julianna Linsey

Ni igikorwa cyakiriwe neza ku mpande zombi

Kanda hano urebe amafoto menshi yaranze iki gikorwa

AMAFOTO: Serge Ngabo - InyaRwanda