U Rwanda rwahawe inguzanyo ya Miliyoni $25 yo kwagura Uruganda rw’Amazi rwa Karenge

Guverinoma y’u Rwanda yasinye amasezerano y’inguzanyo ya miliyoni 25 z’amadorari ya Amerika (asaga miliyari 27 z’amafaranga y’u Rwanda) n'Ikigega cya Abu Dhabi gishinzwe Iterambere (ADFD) mu rwego rwo kwagura ubushobozi bw’uruganda rw’amazi rwa Karenge mu Karere ka Rwamagana, mu Burasirazuba bw’igihugu.

Uru ruganda ruzajya rutanga amazi meza ku baturage benshi mu mujyi wa Kigali no mu bice by’Iburasirazuba, ahantu hakunze kuboneka ikibazo cy’amazi.

Aya masezerano y'inguzanyo yasinyiwe mu Mujyi wa Abu Dhabi ku wa Mbere, aho u Rwanda rwari ruhagarariwe na Ambasaderi w’u Rwanda mu bihugu by’Abarabu, John Mirenge, mu gihe Ikigega ADFD cyari gihagarariwe n’umuyobozi wacyo, Mohamed Saif Al Suwaidi.

Uruganda rw’amazi rwa Karenge, rwari rufite ubushobozi bwo gutanga 15,000 m3 ku munsi, rugiye kwagurwa ku buryo ruzaba rushobora gutanga 36,000 m3 ku munsi, bivuze ko ubushobozi bw’uruganda buzazamuka ku kigero cya 140%. 

Iki gikorwa kizatanga amazi meza ku baturage benshi, aho byitezwe ko izindi metero kibe 21,000 zizajya zigezwa ku baturage bo mu Mujyi wa Kigali n'akarere ka Rwamagana.

Ambasaderi John Mirenge yavuze ko iyi nguzanyo ari intambwe ikomeye mu kugera ku ntego y’u Rwanda yo kugeza amazi meza kuri buri muturage. Yagize ati: “Twishimiye ubu butwererane na ADFD bugaragaza umuhate wa UAE mu guteza imbere iterambere rirambye ku Isi. Kwagura uru ruganda rw’amazi ni gahunda ikomeye ku gihugu cyacu mu kugera ku ntego twihaye zo kugeza amazi meza ku baturage bacu.”

Iki kigega ADFD, cyashinzwe mu mwaka wa 1971, gikora ibikorwa byo gushyigikira imishinga y’iterambere mu bihugu bigera kuri 55, by’umwihariko mu bihugu byo muri Afurika, Aziya, n'Amajyepfo y'Amerika. 

Kimwe mu ntego nyamukuru z’iki kigega ni ugufasha guhangana n’ibibazo by’ingutu birimo ubukene n’ubushobozi buke bwo kubona ibikorwa remezo mu bihugu bikiri mu nzira y’amajyambere.

Mu myaka yashize, ADFD (Abu Dhabi Fund for Development) yagiye ishyigikira imishinga itandukanye mu Rwanda, cyane cyane mu bijyanye no kugeza amazi meza ku baturage. U Rwanda rwari rwasinyanye amasezerano na ADFD mu myaka itatu ishize, aho bafashije mu kubaka ibikorwa remezo by'amazi mu bice bitandukanye by’igihugu.

Uruganda rw’amazi rwa Karenge, nyuma yo kwagurwa, ruzatanga amazi menshi ku baturage bo mu karere ka Rwamagana, kimwe no ku baturage bo mu bice by’umujyi wa Kigali. 

Ubu, amazi akorerwa muri uru ruganda arimo metero kibe 12,000 agera ku baturage bo mu bice bitandukanye by’Umujyi wa Kigali, naho izindi metero kibe 3,000 zigafasha abaturage bo mu mirenge itandukanye y’Akarere ka Rwamagana.

Mu 2024, ikigereranyo cy'Abanyarwanda bafite amazi meza cyari kuri 88%, ariko hagikenewe kongera imbaraga mu kuzamura uyu mubare, cyane cyane mu bice by’uburasirazuba. Guverinoma y’u Rwanda yihaye intego yo kugeza amazi meza kuri 100% by’abaturage mu mwaka wa 2030, kandi iyi nguzanyo ni kimwe mu bikorwa bizatuma icyo cyerekezo kirushaho kugerwaho.

Ikigega ADFD, mu bufatanye na Guverinoma y’u Rwanda, kizakomeza gufasha mu kongera ubushobozi bw’imishinga y'amazi, birushaho kuzamura imibereho y’abaturage no kurushaho kugera ku ntego z’iterambere rirambye.

Iyi gahunda yo kwagura uruganda rw’amazi rwa Karenge ni indi ntambwe ikomeye u Rwanda rufashe mu gukemura ikibazo cy’amazi meza, kimwe no mu guharanira iterambere rirambye ku baturage bose.

U Rwanda rwahawe inguzanyo ya Miliyoni $25 yo kwagura Uruganda rw’Amazi rwa Karenge

Umwanditsi: TUYIHIMITIMA Irene