Harimo kwirukanwa nta nteguza! Ikibazo cy'abakozi ba WASAC na REG baka ruswa cyavugutiwe umuti

Ni muri gahunda y’Icyumweru cyo kurwanya Ruswa cyatangiye ku wa Gatandatu tariki ya 30 Ugushyingo 2024, akaba ari ngarukamwaka aho habamo ibikorwa bitandukanye bigamije kwitegura umunsi wo kurwanya ruswa.

Nk’uko Umuvunyi Mukuru,Nirere Madeleine  yabitangaje, batumije iyi nama nyunguranabitekerezo kuko basanze muri gahunda y’iterambere rirambye (NST2) harimo gushyira ingufu mu kwihutisha ikoranabuhanga, guha amazi n’amashanyarazi abaturage kandi kugira ngo bigerweho, bikaba bisaba ko bikorwa mu mucyo no mu buryo bwihuse ndetse buri muturage agahabwa ibyo yemerewe.

Umuvunyi Mukuru,Nirere Madeleine, yavuze ko iyi nama ya mbere y’icyumweru cyahariwe kurwanya ruswa, igamije kunoza Serivisi, ati“Turarebera hamwe uburyo hanozwa imitangire ya serivisi, uburyo iyo ruswa ivugwamo yarwanywa ku buryo bwose bushoboka.”

Umuyobozi Nshingwabikorwa wa Transparency International Rwanda, Mupiganyi Appolinaire yavuze ko bakora ubushakashatsi buri mwaka buzwi nka Rwanda Bribery Index, aho mu mwaka wa 2022 RURA yaje ku isonga mu kugira ruswa ikagaragara cyane mu bashaka imirongo yo gutwara abantu, mu gihe REG igaragara ruswa mu gutanga mubazi no kuzishyirirwaho.

Yavuze ko kubera ko izi serivisi zikenerwa n’abantu benshi, bituma hagaragaramo icuho cya ruswa, akaba ariyo mpamvu Urwego rw’Umuvunyi rwabatumijeho kugira ngo babiganireho banafate umwanzuro w’uburyo byacika.

Yagize ati “Kubera ko izo serivisi zikenerwa n’abantu benshi, harimo ibyuho ku buryo budasanzwe, akaba ariyo mpamvu Urwego rw’Umuvunyi rwashatse ko tubiganiraho mu buryo bwihariye.”

Umunyamabanga Uhoraho muri Minisiteri y’Ibikorwa remezo,Abimana Fidele yatangaje ko mu rwego rwo kurwanya ruswa muri ibi bigo, hashyizweho ingamba zikakaye zo kuyirwanya ku buryo bizeye neza ko izo ngamba zizatanga umusaruro ufatika muri iyi gahunda.

Yagize ati “Muri Minisiteri hari ingamba zitandukanye twafashe harimo gutanga serivisi nyinshi ku ikoranabuhanga, aribyo bigabanya icyuho cyazana ruswa cyangwa gutanga Serivisi mbi aho biri gukorwa muri WASAC na REG bikaba bigeze kure.

Ikindi ni ukutihanganira ufatiwe mu bikorwa byo kwakira ruswa n’indonke nk’amakosa akomeye y’akazi aho ubifatiwe yirukanwa nta nteguza.”

Uyu munyamabanga yahise avuga ko hari gukorwa ibishoboka byose kugira ngo buri Karere kagire ishami rya WASAC nk’uko bikubiye muri Politiki ya Leta.

Ati “Politiki ya Leta yasabye ko tugira ishami muri buri karere kandi ariya mashami harimo harakorwa ibishoboka byose ngo ahabwe ingufu n’ibikoresho bihagije harimo n’uburyo bwo kubatwara aho buri shami rizagira imodoka ariko na moto zo gutwara abakozi ngo bagere ku baturage.

Ubwo bushobozi igihe bwabonetse, kubigira urwitwazo bizavaho hanyuma ufatiwe muri ibi bikorwa ahanwe by’intangarugero.”

Uyu mwanzuro wafashwe nyuma y'uko hari benshi mu bakozi ba WASAC bajyaga bihengekana abaturage hanyuma bakabaka amafaranga bita ay’urugendo kandi ibyo bitaba biri ku mutwe w’umuturage.

Kujyana izi nzego za WASAC mu rwego rw’Akarere, bizabaganya abakaga ruswa bavuga ko hari ibikoresho bike kandi bituruka kure bityo bakaka ruswa abaturage kugira ngo babahe serivisi bemerewe, nko kubaha Mubazi cyangwa se kuyibashyirira mu nzu zabo.

Raporo ya Transparency International Rwanda igaragaza ko ku kigero cya 80%, abaturage bemera ko Ruswa ari nke ariko iriho, akaba ariyo mpamvu buri muturage asabwa gukora uko ashoboye kose ngo arwanye ruswa ndetse anatange amakuru ku hantu  iri.

Urwego rw'Umuvunyi rwateguye inama nyungurana bitekerezo yabahuje n'ibigo bifitiye inyungu abaturage

Umuvunyi Mukuru, Nirere Madeleine yavuze ko iyi nama igamije kungurana ibitekerezo ku buryo bwo kurwanya ruswa muri ibi bigo bifitiye akamaro abaturage

Umunyamabanga uhoraho muri Minisiteri y'Ibikorwa Remezo, yatangaje ko serivisi za WASAC zigiye kujya zitangwa ku rwego rw'Akarere mu rwego rwo kugabanya ibyuho bya ruswa bikigaragara mu bakozi b'ibi bigo