Umukinnyi ukomoka muri Centrafrique, Théodore Yawanendji-Malipangou Christian uri kuvugwa ko ashobora kwerekeza muri Rayon Sports, yasezeye kuri Gasogi United,ashimira abarimo Perezida wayo, Kakooza Nkuliza Charles.
Mu gitondo cyo kuri uyu wa Gatatu tariki ya 27 Ugushingo 2024, nibwo uyu mukinnyi abinyujije ku rubuga rwa Whatsapp abakinnyi ba Gasogi United bahuriramo, yanditse ubutumwa busezera ku muryango w'iyi kipe, ashimira abakinnyi, abatoza ndetse na Perezida wayo.
Yagize ati" Ndabasuhuje mwese. Ndifuza gufata uyu mwanya, ngo nshimire byimazeyo Umuryango mugari wa Gasogi United, harimo Umuyobozi w'ikipe, Kakooza Nkuliza Charles [KNC], abatoza, abakinnyi dukinana n'abafana b'ikipe b'indahemuka.
Ubufasha bwanyu, kunshyigikira no kungirira icyizere muri uru rugendo byari akataraboneka, kandi ntewe ishema cyane n'ibyo twageranyeho.
Nongeye kubashimira na none ku bw'ibyo twanyuranyemo, ni ibihe byiza nzahora nibuka, ndifuriza Gasogi United ishya n'ihirwe mu bihe biri imbere no gukomeza kwitwara neza yaba mu kibuga ndetse no hanze yacyo."
Malipangou yasezeye kuri Gasogi United nyuma y'uko ibiganiro byo kongera amasezerano muri iyi kipe bitagenze neza. Uyu mukinnyi wari warayigarutsemo mu ntangiriro z'uyu mwaka avuye mu ikipe ya FC Darhea, amakuru avuga ko ashobora kwerekeza mu ikipe ya Rayon Sports aho yazatangira kuyikinira mu kwezi kwa Mbere k'umwaka utaha.
Uyu mukinnyi ukina mu kibuga afasha ba rutahizamu gusatira, avuye muri Gasogi United amaze gutsinda ibitego bine muri shampiyona y'uyu mwaka.
Eng
RSS 
TANGA IGITECYEREZO