Rwanda Premier League: Kiyovu Sports yatoye akuka nyuma yo gutsinda Etincelles -AMAFOTO

Kuri uyu wa Gatanu itariki 22 Ugushyingo 2024 ikipe ya Kiyovu Sports yari yakiriye Etincelles FC mu mikino y'umunsi wa 10 wa Shampiyona y'u Rwanda, Rwanda Premier League 2024-24.

Muri uyu mukino amakipe yombi yamanutse mu kibuga ashaka gutsinda, kuko Kiyovu Sports yari iya nyuma n'amanota 3, mu gihe Etincelles FC yo yari ku mwanya wa 14 n'amanota umunani.

Ikipe ya Etincelles FC yaje mu kibuga ikubita agatoki ku kandi cyane ko mu mukino w'umunsi wa cyenda yari yatsinzwe na Rayon Sports igitego kimwe ku busa, kandi iyi kipe yari ifite intego yo kuzazengereza amakipe yo mu mujyi wa Kigali.

Ni umukino watangiye Etincelles FC yatakana imbaraga zidasanzwe ibifashijwemo na Robert Mukoghotya ariko abakinnyi ba Kiyovu Sports batangiye bugarira neza. Na Kiyovu ibifashijwemo na Shelf Bayo yagerageje kwataka ariko ba myugariro ba Etincelles baba ibamba

Ikipe ya Etincelles FC yagumye kwataka bidasanzwe, ku munota wa 18 Robert Mukoghotya ananirwa gutsinda umupira yari ahawe na Rutayisire Aman naho ku munota wa 31 Ciza Hussein kufura yari ahawe ayitera ku ruhande.

Kiyovu Sports yo yagerageje uburyo bwa Nizeyimana Djuma butatanze umusaruro. No ku munota wa 31 Mosengo Tanseley ahaye umupira Migisha Desire ananirwa gufungura amazamu.

Amakipe yombi yagumye kwataka bidasanzwe ashakisha igitego ariko biranga, iminota 45 irangira nta kipe irabona igitego maze umusifuzi yongeraho iminota ibiri y'inyongera, Igice cya mbere kirangira ari ubusa Ku busa.

Igice cya kabiri cyagarukanye imbaraga zidasanzwe ku ruhande rwa Kiyovu Sports, nuko ku munota wa 48 ibona kufura nyuma y'ikosa ryakorewe Shelf Bayo. Kufura yatewe na Masengo Tanselo nuko Ishimwe Kevin atsinda igitego cya mbere cya Kiyovu Sports.

Etincelles FC ikimara gutsindwa igitego, yahise yatakana imbaraga zidasanzwe n’uko ikipe ya Kiyovu Sports ibura ubuhumekero. Ku munota wa 82 Etincelles yabonye igitego cyo kwishyura cyatsinzwe na Niyonkuru Sadjati nyuma y’amakosa yakozwe n’umuzamu wa Kiyovu Sports.

Iminota 90 y’umukino yarangiye amakipe yombi anganya igitego kimwe kuri kimwe n’uko umusifuzi yongeraho iminota itanu kugira ngo umukino urangire. Mu minota y'inyongera ikipe ya Kiyovu Sports yagumye kwataka ishaka igitego ariko amahirwe yayo aguma kuba make cyane.

Ku munota wa 90+4 Kiyovu Sports yongeye kubona amahirwe imbere y'izamu rya Etincelles FC maze Mbonyingabo Regis akora ibyifuzwaga n'abakunzi ba Kiyovu ayitsindira igitego cya kabiri maze umukino urangira Kiyovu ibonye intsinzi ya kabiri.

Gutsinda uyu mukino bitumye Kiyovu sports igira amanota 6, iba ivuye ku mwanya wa nyuma ijya ku mwanya wa 15, mu gihe vision FC ariyo iraye ku mwanya wa nyuma n'amanota 5. Gutsindwa uyu mukino kuri Etincelles FC, byatumye iguma ku manota umunani n'umwanya wa 13.

Ikipe ya Kiyovu Sports yabonye intsinzi ya kabiri muri shampiyona iva ku mwanya wa nyuma

Kiyovu Sports yongeye kubona intsinzi, Nyamirambo irasusuruka nyuma yo gutsinda Etincelles

Abakinnyi babanje mu kibuga ku ruhande rwa Kiyovu Sports 

Abakinnyi babanje mu kibuga klu ruhande rwa Etincelles FC