Rafael Nadal yashyize akadomo ku rugendo rw’imyaka 20 akina Tennis -VIDEO

Byari amarira ku maso, agahinda ku bakunzi ba Tennis Ball mu ijoro ryo kuri uyu wa Kabiri itariki 19 Ugushyingo 2024 mu mujyi wa Malaga, mu gihugu cya Espagne. 

Umukino wa nyuma Rafael Nadal yakinnye mu irushanwa rya Davis Cup warangiye atsinzwe n’Umuholandi Botic van de Zandschulp ku bitego 6-4, 6-4, bishyira akadomo ku rugendo rwe rwamaze imyaka 20.

Mu kibuga cyuzuye abafana batabashije guhisha amarangamutima, Nadal w’imyaka 38 yavuze ijambo agaruka ku byo yakoze mu buzima bwe bwo gukina Tennis, agira ati "Nsezeye nishimye kandi nishimiye umurage nsize"

Mu ijambo rye ry’iminota 15, Nadal yatangaje ko asezeye uyu mukino atuje ku mutima, kuko yagerageje kuba umuntu mwiza kandi asize umurage wishimirwa na buri wese. 

Ati: "Ikintu cy’ingenzi nakoraga ni ukwihatira kuba umuntu mwiza, kandi nizeye ko mwabibonye, nsezeye ku mukino wa Tennis ariko nishimiye inshuti nyinshi nagize mu rugendo rwose."

Nadal yongeye gushimira cyane abafana be, cyane cyane abo muri Espagne, avuga ko imyaka irenga 20 yamaze mu kibuga yamweretse urukundo rudasanzwe rw’abafana ku isi yose.

Nubwo yakinnye umukino wa nyuma mu mateka ye, ibyifuzo byo gusoza atsinda ntibyashobotse. Ni nyuma yo gutsindwa umukino we wa nyuma ndetse na Espagne igasezererwa muri Davis Cup.

Nadal yagize ati: "Ni ukuri, ibintu ntibyagenze uko twabishakaga. Naritanze uko nshoboye, ariko umubiri wanjye wambwiye ko udashaka gukomeza gukina Tennis, kandi ngomba kubyakira."

Nadal yavuze ko nubwo atsinzwe, yabashije gusoza urugendo rw’ubuzima bwe bwa Tennis yishimira amahirwe yagize yo gukora ibyo yakundaga.

Nadal asize amateka adasanzwe mu mukino wa Tennis, harimo ibikombe 22 bya Grand Slam byamugize icyamamare ku isi yose. Yabaye icyitegererezo muri Davis Cup, aho yari afite agahigo ko kudatsindwa mu mikino 29 yikurikiranya kugeza kuri uyu mukino wa nyuma.

Nadal yashimiye umuryango we, ikipe yamufashije, n’inshuti ze zose, avuga ko ibyo byose atari kubigeraho atabagize hafi. Ati "Ndashimira umuryango wanjye, ikipe yanjye n’inshuti zanjye. Sinshidikanya ko mwagize uruhare mu rugendo rwose. Ngenda, nishimira ibyo twagezeho."