Ibihugu 24 bizitabira CAN 2025 byamaze kumenyekana

Iri rushanwa rikomeye ku mugabane wa Afurika rizabera mu gihugu cya Maroc kizakira iri rushanwa, bityo kikaba cyarabonye itike nta mukino n’umwe gikinnye mu gushaka itike. 

Biteganyijwe ko iri rushanwa rizatangira mu Ukuboza umwaka utaha, rikazitabirwa n’amakipe akomeye ndetse n’amashya ashaka kwerekana ko ashobora kwigaragaza ku rwego rwa Afurika.

CAN [AFCON 2025] izahuriza hamwe ibihugu bikomeye mu mupira w’amaguru, harimo ibyigeze kwegukana iki gikombe n’ibishaka kuzamura izina ryabyo. Muri byo harimo Senegal iyoboye urutonde rwa FIFA muri Afurika, yitezweho gukomeza gusigasira ishema ryayo.

Algeria yigeze gutwara iki gikombe muri 2019, nayo yamaze kwemeza ko yiteguye kwerekana ko itakubiswe n’umuyaga, Côte d’Ivoire, ifite igikombe giheruka cyatanzwe mu 2023, nayo izaba yitezweho kuguma kuba ku isonga, Nigeria, Tunisia na Afurika y’Epfo, amakipe y’amateka akomeye nayo yamaze kubona itike yo kujya mu gikombe cya Africa.

Abakunzi b’umupira w’amaguru bazabona amakipe amaze igihe adakina AFCON, harimo Botswana izitabira nyuma y’imyaka 12, ndetse na Zimbabwe itaragaragayemo mu bihe bya vuba kubera impamvu zitandukanye. Ibyo bigaragaza uko imikino y’umupira w’amaguru muri Afurika iri gukura ndetse n’ibihugu byinshi bikagerageza guhangana.

Umukino Mozambique yakinnye na Guinea-Bissau wabaye ingenzi cyane kuko ari wo washyize akadomo ku bagombaga kuzitabira. Ku ntsinzi y’ibitego 2-1, Mozambique yabonye intsinzi itazibagirana yayihaye itike yo kwitabira igikombe cya Africa.

Urutonde rw’Ibihugu 24 bizitabira

1.     Maroc (Izakira irushanwa)

2.     Burkina Faso

3.     Cameroun

4.     Algeria

5.     DR Congo

6.     Senegal

7.     Misiri

8.     Angola

9.     Equatorial Guinea

10. Côte d’Ivoire

11. Uganda

12. Afurika y’Epfo

13. Gabon

14. Tunisia

15. Nigeria

16. Zambia

17. Mali

18. Zimbabwe

19. Comoros

20. Sudan

21. Benin

22. Tanzania

23. Botswana

24. Mozambique