Airtel yamuritse ikoranabuhanga rya 'VoLTE' rifasha abantu guhamagara bifashishije internet ya 4G

Kuwa Kabiri tariki 19 Ugushyingo 2024, mu gikorwa cyitabiriwe n'abayobozi banyuranye biganjemo abo mu nzego za Leta n'abikorera, Airtel Rwanda yatangije uburyo bushya buzwi nka 'Voice Over LTE (VoLTE)' bufasha abantu bakoresha telefoni guhamagara bakumvikana, amajwi akagenda neza nta zindi mbogamizi zibayeho.

Ubusanzwe abantu bakoresha telefoni nto zikoresha internet ya 2G mu guhamagarana cyangwa 3G ibintu bituma rimwe na rimwe ihuzanzira ridakora neza ndetse n’amajwi akaba yacikagurika.

Ikindi ariko gukoresha ubwo buryo byatumaga ikiguzi cyo guhamagara gihenda kuko ari ikoranabuhanga rya kera.

Umuyobozi Mukuru wa Airtel Rwanda, Emmanuel Hamez, yagaragaje ko batangije ubwo buryo bushya buzafasha mu kunoza serivisi zo guhamagarana ku bakoresha umuyoboro wa Airtel.

Ati “Iki ni igihe cy’agaciro kuri Airtel Rwanda kuko turi imbere mu kuzana uburyo bwa Voice over 4G (VoLTE) mu gihugu, butanga ubunararibonye buhebuje mu guhamagara mu ijwi ry’umwimerere rya HD, guhita uhamagara vuba, ndetse no gukomeza gukoresha internet mu gihe uhamagaye.

Yakomeje ati “Umuyoboro wacu wa 4G ugera ku gihugu hose ku gipimo cya 95%, utuma buri Munyarwanda wese abasha gukoresha internet yihuta kandi yizewe. Ikiruta byose, nta kiguzi cyiyongera ngo wimukire kuri VoLTE yacu.”

Yagaragaje ko ibyo bibaye nyuma y’uko Airtel Rwanda igejeje ku Banyarwanda telefoni zihendutse kandi zakira internet ya 4G bityo ko nta mpungenge zihari.

Rugambwa ushinzwe amategeko muri Airtel yasobanuye ko iri ari ikoranabuhanga rishya kandi ryihuta, ndetse rijyanye na gahunda ya Leta ya 'Broadband Policy' yasohotse muri 2022 igamije ko serivisi z'ikoranabuhanga zimukira kuri tekinoloji nshya kandi ryihuta, ndetse Abanyarwanda bose bakazibona ku giciro cyiza.

Iyo sosiyete kandi kuri ubu internet yayo ya 4G igera mu gihugu hose ku kigero cya 95% ibintu bituma ushobora kubona internet yihuta kandi ihendutse aho waba uri hose.

VoLTE ni bumwe mu buryo bwiza bufasha mu kugabanya igiciro cyo guhamagara kuko usanga byoroshye, bikihuta kandi hadatakaye ikiguzi kinini bitandukanye n’uburyo busanzwe bwifashisha internet ya 2G cyangwa 3G.

Umuyobozi Ushinzwe Ikoranabuhanga muri RURA, Charles Gahungu, yashimye ikoranabuhanga rya Airtel Rwanda, agaragaza ko kuba harashyizweho uburyo bworohereza abashoramari byahaye amahirwe ibigo by’itumanaho.

Yagize ati “Ibi byahaye amahirwe ibigo by’itumanaho kwishimira ikoranabuhanga rishya no kurikoresha kandi ni na yo mpamvu tubashimira kuba barafashe ayo mahirwe. Rimwe na rimwe ushobora kuyashyiraho ariko abantu ntibayakoreshe.”

Yakomeje agaragaza ko bakataje mu rugendo rw'ikoranabuhanga, aragira ati: "Kugeza ubu navuga yuko tuvuye mu rugendo, kandi turacyakomeje. Urugendo rw'ikoranabuhanga ni urugendo ruhoraho. [...] icya mbere tuba twifuza ko ibigo byacu bidasigara inyuma cyane kugira ngo nabyo bibashe gutanga serivisi zigezweho, n'abaturage na bo babone izo serivisi."

Umunyamabanga Uhoraho muri Minisiteri y’Ikoranabuhanga na Inovasiyo, Yves Iradukunda, yagaragaje ko u Rwanda rushyize imbere ikoreshwa ry’ikoranabuhanga rigezweho, ashimira Airtel Rwanda igeze ku ntego yo gutangiza ubwo buryo bushya bwo guhamagara.

Ati: “Iyi ni intambwe ikomeye mu iterambere ry'ikoranabuhanga mu Rwanda. Impamvu yo kubashimira ni uko iyo twebwe dushyizeho intego runaka, tuba dukeneye abafatanyabikorwa bayumva, bakayifata nk’iyabo kandi bakishimira gukorana natwe.”

Yagaragaje ko hakiri urugendo rwo gufasha abaturage ngo babashe gukoresha iyo serivisi nshya, yemeza ko abakoresha umurongo wa Airtel bazabona impinduka nziza mu gihe bazaba batangiye gukoresha ubwo buryo.

Airtel yatangije uburyo bushya bwo guhamagara umuntu yifashishije 4G

Niyo Sosiyete ya mbere y'Itumanaho mu Rwanda izanye aka gashya

Abafatanyabikorwa barimo n'inzego za Leta zifite mu nshingano iterambere ry'ikoranabuhanga zishimiye intambwe ikomeye Airtel yateye

Umuyobozi Mukuru wa Airtel Rwanda, Emmanuel Hamez yagaragaje ko ubu buryo bushya ubu bushobora gukoreshwa mu gihugu hose

Charles Gahungu ushinzwe Ikoranabuhanga muri RURA yavuze ko urugendo rw'ikoranabuhanga ruhoraho

Umunyamahanga Uhoraho muri MINICT, Yves Iradukunda yavuze ko Airtel yateye intambwe ikomeye mu iterambere ry'ikoranabuhanga

Ubwo Umuyobozi Mukuru wa Airtel n'Umunyamabanga Uhoraho muri MINICT baganiraga

Abakorera Airtel Rwanda bitabiriye iki gikorwa

Abayobozi banyuranye bitabiriye babonye umwanya uhagije wo kuganira

Inkumi zo muri Kigali Protocol ni zo zakiraga abashyitsi 

Byari ibyishimo bidasanzwe

Kanda hano urebe amafoto menshi yafatiwe muri iki gikorwa

AMAFOTO: Jean Nshimiyimana - InyaRwanda