BNR yasabwe guhagurukira abishyuza serivisi mu mafaranga y’amahanga: Uhamwe n’iki cyaha ahanishwa iki?

Abagize Inteko Inshinga Amategeko basabye Banki Nkuru y'u Rwanda (BNR) gufata ingamba zihamye ku kibazo cy'abacuruzi bishyuza mu madolari zimwe muri serivisi, ndetse no gukurikirana aho abaturage bahabwa serivisi za Banki mu ndimi batumva bigakosorwa.

Ibi, Banki Nkuru y'u Rwanda yabisabwe nyuma y’uko igejeje ku Nteko Ishinga Amategeko raporo ikubiyemo ibikorwa byo kuva ku itariki ya 01 Nyakanga 2023 kugeza ku itariki ya 30 Kamena 2024.

Ikibazo cy'abatanga zimwe muri serivisi bishyuza mu madolari kandi bari mu Rwanda cyakunze kugaragazwa ahanini n'abacuruzi. Cyongeye kugarukwaho n'abagize Inteko Ishinga Amategeko ubwo bagezwagaho raporo n'Ubuyobozi bwa Banki Nkuru y'u Rwanda, BNR kuko ngo bikomeje gutya ifaranga rw'u Rwanda ryaba riri mu kaga.

Abadepite n’Abasenateri kandi basabye BNR gukoresha ururimi rw'Ikinyarwanda batanga serivisi z'imari ku baturage, mu rwego rwo kubafasha kumenya neza ibikubiye mu masezerano runaka bagirana n'ibigo by'imari bigenzurwa na BNR.

Guverineri wa Banki Nkuru y'u Rwanda, John Rwangombwa asaba abacyishyura mu madolari ko batanga ayo makuru, ubundi ababikora bakabiryozwa.

BNR ivuga ko kandi ikomeje kunoza imikoreshereze y'inyandiko zanditswe mu Kinyarwanda cyane cyane izireba abaturage.

Si ubwa mbere BNR isabwe guhagurukira iki kibazo, kuko n’umwaka ushize yaburiye abacuruza cyangwa bacyishyuza serivisi mu mafaranga y’amahanga (amadevize) ko hari ibihano bibateganyirijwe.

BNR isobanura ko ibyo bintu bitemewe kandi ko bihanwa n’amategeko, aho igira iti: “Hakurikijwe Itegeko N48/2017 ryo ku wa 23/09/2017 rigenga Banki Nkuru y’u Rwanda nk’uko ryahinduwe kugeza ubu, biteganyijwe ko inshingano zose zizamo amafaranga cyangwa ibikorwa byose bikorewe muri Repubulika y’u Rwanda bigomba gushyirwa kandi bikishyurwa mu mafaranga y’u Rwanda.”

Iyi banki isobanura ko gushyiraho ibiciro ku bicuruzwa na serivisi mu mafaranga y’amahanga bibujijwe kandi bihanwa n’amategeko, ariko igakomeza igira iti: “Icyakoze, ibigo bitanga serivisi zigaragaza ko bikorana n’abanyamahanga byo byemerewe kwakira aya mafaranga y’amahanga. Ibyo birimo amahoteli, inzu z’imikino, amaduka atishyura amahoro ya gasutamo, sosiyete zikorana na ba mukerarugendo n’amashuri mpuzamahanga.”

BNR yamenyesheje abantu bose ko ufashwe agurisha ibicuruzwa cyangwa akishyuza serivisi mu mafaranga y’amahanga atabifitiye uburenganzira, ahanishwa gufatirwa amafaranga yose yavuye muri icyo gikorwa.