Umukinnyi wa Tottenham yahanishijwe guhagarikwa imikino 7 kubera amagambo y'ivangura

Bentancur yashinjwe kuvuga amagambo asuzugura yerekeye Son Heung-min ubwo yaganiraga n'umunyamakuru wavuze Son nk'izina ry’umunya-Koreya. FA yavuze ko amagambo ye yari arimo ivangura, kandi arimo guha abandi isura mbi. 

Nubwo Bentancur yisobanuraga avuga ko ibyo yavuze byari urwenya rugamije kwereka umunyamakuru ko gutangaza izina ry’umuntu muri ubwo buryo bidakwiriye, akanama ka FA kemeje ko ayo magambo yari mabi kandi akwiye guhanwa.

Mu bisobanuro byatanzwe, amagambo Rodrigo Bentancur yavuze yatumye ahanwa, ntabwo yashyizwe ahagaragara mu buryo bwimbitse, ariko icyagaragajwe ni uko yanyujijemo amagambo yerekeye isura cyangwa imyirondoro y’Abanya-Koreya ubwo yari ari gusubiza umunyamakuru wavugaga kuri mugenzi we Son Heung-min nka "umunya-Koreya".

Uretse guhagarikwa gukina imikino 7, Bentancur yanaciwe ihazabu ingana na £100,000 (asaga miliyoni 150 Frw) kandi ategekwa kujya mu masomo yo gusobanukirwa no kwigishwa imyitwarire. 

Uyu mukinnyi ntabwo azagaragara mu mikino ikomeye ya Premier League irimo iyo Tottenham izahura na Manchester City, Liverpool, na Chelsea, kimwe n’umukino wa 1/4 cya League Cup bazakina na Manchester United. Gusa nubwo bimeze bityo, azakomeza gukinira Tottenham mu mikino ya Europa League.

Tottenham yashyikirije FA ubusobanuro buvuga ko amagambo ya Bentancur atari agamije ivangura ahubwo yari urwenya rworoheje. Bentancur we yavuze ko asaba imbabazi ku kuntu amagambo ye yasohotse nabi, ariko ngo ntiyari agamije kubabaza mugenzi we Son Heung-min cyangwa abandi bose b’abanya-Koreya.

FA yavuze ko nubwo Bentancur atigeze agira amakosa nk’ayo mu myaka yashize, amagambo ye yafashwe nk’atuma habaho gutesha agaciro k’undi muntu hashingiwe ku bwenegihugu bwe. 

FA yashimye ukwicuza kwe ariko ivuga ko amagambo y’ubusobanuro yatanzwe yagiye ashingira ku kugabanya uburemere bw’ikosa ryakozwe, bigatuma igihano kigumana uburemere.

Bentancur ni umwe mu bakinnyi b’imena muri Tottenham, akaba amaze gukina imikino 15 muri Premier League uyu mwaka, aho yatsinze igitego cya mbere mu mukino batsinzwemo na Ipswich tariki 11 Ugushyingo.

Icyakora, uyu mukinnyi azakomeza gukinira Tottenham mu mikino ya Europa League, aho ikipe ye ikomeje gushaka umwanya mwiza ku mugabane w’u Burayi.

Rodrigo Bentancour yahanishijwe kumara imikino irindwi adakina kubera amagambo atari meza yavuze kuri mugenzi we Son wo muri Koreya