Ibyihariye ku itsinda ry'abaramyi bane 'Redemption4 Voice' ryongeye gukora mu nganzo - VIDEO

Iyi ndirimbo yabo nshya ije nyuma y'igihe iri tsinda rya Redemption4 Voice rikora umuziki wo kuramya no guhimbaza Imana, ibintu abarigize bavuga ko bakora babikunze guhera mu mwaka wa 2021 biyemeje gukurikira umuhamagaro.

Umuhanzi ubarizwa muri iryo tsinda wanagize igitekerezo cyo kurishinga witwa Mupenzi Gad, avuga ko itsinda ryabo rihamaharira abantu kureka ibyaha bakibuka ko bacunguwe na Yesu Kristo.

Yagize ati "Tujya gukora itsinda byaturutse kuri njye kuko nari nsanzwe ndirimba muri Chorale yo Kuri ADPR Rwinkwavu bagenzi banjye nabo ni abaririmbyi bazi kuririmba kuko twakuriye mu Itorero. 

Indirimbo twasohoye irimo ubutumwa twageneye abantu kugira ngo bareke ingeso mbi. Mu butumwa buri mu ndirimbo zacu tuba dukangurira abantu bose kwibuka ko twacunguwe na Yesu umucunguzi wacu."

Mu kiganiro bagiranye na InyaRwanda, abagize iri tsinda bemeje ko iyi ndirimbo bashyize ahagaragara ifite umwihariko ugereranije n'izindi zose bakoze. 

Umwe mu basore bane barigize witwa Mupenzi Gad yagize ati: "Iyi ndirimbo ifite ubutumwa bwihariye bugenewe buri wese wayumva ari mu bihe byiza cyangwa se ibimukomereye."

Akomeza avuga ko iyi ndirimbo yabo nshya ikubiyemo ubutumwa bugarurira icyizere abantu bari mu bihe byo kwiheba, ikabongerera kwizera 'kuko hari umunsi ibihe bizahinduka bikaba byiza.'

Iri tsinda ry'abasore bane Redemption4 Voice, ryamenyekanye cyane kubera indirimbo zo kuramya Imana ryagiye rishyira hanze mu bihe bitandukanye; zikaba zaragiye zikundwa na benshi biturutse ku butumwa buba buzikubiyemo bugarurira abantu ihumure, ndetse no kwizera.

Zimwe mu ndirimbo baherutse gushyira hanze harimo iyitwa 'Niwe Mugabane,' imaze kurebwa n'abantu barenga ibihumbi 10 ku muyoboro wa YouTube. Bakoze n'izindi nka 'Mu biremwa byose,' na 'Nabaye Mushya.'

Urugendo rwabo bavuga ko rwatangiye bakiri bato igihe bigaga umuziki muri 'Sunday school' ndetse bagakurira no muri korari, gusa nyuma baza kubona bidahagije ari nabwo bahise biyemeza gukora itsinda bise 'Redemption4 Voice,' kugira ngo ubwo butumwa bwiza bubashe kugera kuri benshi.

Iyi ndirimbo yabo nshya yabatwaye amezi atanu kugira ngo ijye ahagaragara, amajwi yayo akaba yaratunganijwe na Producer Thug beat, mu gihe amashusho yo yakozwe na Nassi. Iri tsinda kandi rivuga ko rifite indirimbo nyinshi zamaze gukorwa mu buryo bw'amajwi ariko kubera ubushobozi zikaba zitaragera hanze.

Iri tsinda rikora indirimbo z'agakiza, rirashimira abanyarwanda uburyo bakiriye indirimbo zabo za mbere, ari na yo mpamvu basaba gukomeza gushyigikirwa, ibihangano byabo bikabasha kugira impinduka nziza bizana mu buzima bw'abizera benshi.

Itsinda ry'abasore b'abaramyi biyise 'Redemption4 Voice' ryongeye gushyira hanze igihangano gishya

Bafite intego yo gukomeza gushyira hanze ibihangano byinshi bihumuriza benshi nubwo bagikomwa mu nkokora n'ubushobozi

">Kanda hano urebe indirimbo nshya y'itsinda rya Redemption4 Voice bise "Kuki Utamwizera?"

">