Umunyarwandakazi yashyizwe mu barenga 200 bazatarama mu iserukiramuco ritavugwaho rumwe muri Uganda

Ni iserukiramuco ritavugwaho rumwe mu bitangazamakuru ndetse no mu buyobozi bukuru bw'igihugu, ahanini bitewe n'ibikorwa biyirangwamo. 

Mu 2022, Umwe mu bagize Inteko Ishinga Amategeko ya Uganda yari yavuze ko iyi ‘konseri’ ari “urubuga rwo kubiba ubusambanyi”. Ariko kandi Martin Magara, minisitiri w’ubukerarugendo, we yari yavuze ko iri serukiramuco rituma umubare w’abakerarugendo muri Uganda wiyongera.

Ibi byazamuye umwuka mubi mu baryitabira n’abaritegura, Leta ifata icyemezo cy’uko rikomeza, ariko hashyirwaho amabwiriza.

Icyo gihe Minisiteri ishinzwe imyifatire yahaye uburenganzira iryo serukiramuco ishingiye ku kuba nta bana bemererwa kurijyamo kandi ko nta muntu urijyamo yambaye ubusa. 

Mu 2018, Nyege Nyege yabanje guhagarikwa ishinjwa gushishikariza ubusambanyi mu kivunge ariko nyuma yemererwa gukomeza kubera ubusabe bwa benshi muri rubanda.

Dj Alisha washyizwe ku rutonde ari mu bagezweho mu tubyiniro tunyuranye muri Uganda, ndetse kuva mu myaka ibiri ishize yagiye atumirwa gutaramira muri Hoteli zinyuranye i Kigali. Ni umunyarwandakazi ariko usanzwe ukorera umuziki muri Uganda.

Mu 2023 iri serukiramuco ryaririmbyemo umuraperi Bushali, ni mu gihe kuri iyi nshuro hatumiwe Dj Alisha gusa.

Uyu mukobwa avuga ko yavukiye kandi akurira mu Rwanda, ariko igihe cyarageze yerekeza muri Uganda ari naho akorera akazi ke. Yatangiye akazi ko kuvanga imiziki kuva mu 2018.

Iri serukiramuco rizaba mu gihe cy'iminsi ine guhera ku wa 14 Ugushyingo 2024 kugeza ku wa 17 Ugushyingo 2024 ribera ahitwa Source of the Nile mu gace ka Jinja i Kampala muri Uganda.

Iri serukiramuco ritegurwa hagamijwe guteza imbere umuco wa Uganda mu nguni zose z'ubuzima. Kuri iyi nshuro rizahuriza hamwe abantu bo mu bihugu nka Sudan, Congo, Erithrea, Burundi, Ethiopia n'ahandi hanyuranye.

Rirangwa kandi n'ibitaramo by'abahanzi, kumurika imideli n'ibindi. Dereke Debru utegura iri serukiramuco yagaragaje ko bashyize imbere kwakira neza abitabira iri serukiramuco, ndetse no gufasha buri wese kugaragaza umuco w'igihugu cye nk'uko biteguye.

Imibare igaragaza ko mu 2023 iri serukiramuco ryitabiriwe n'abantu barenga 20,000. Kuri iyi nshuro ho byitezwe ko iri serukiramuco rizahanga imirimo ku bantu barenga 2,000.

Itangazo rigenewe abanyamakuru rigaragaza ko iri serukiramuco rizaririmbamo abahanzi 100 bo mu bindi bihugu barimo nka Major AJ, Tar1q, Candy Bleakz n'abandi.

Dereke Debru yavuze ko "Dufite abahanzi benshi mpuzamahanga tuzakorana, yaba abo mu Buyapani, Norway, Afurika y'Epfo n'abandi, kandi hategurwa 'stage' zirenga umunani ku buryo buri wese azoroherwa no kureba ibi muri iri serukiramuco'. 

Uretse abahanzi batumiwe, hanatumiwe Kampire, Janja, Hibotep, Melyn, Ali Breezy, VXFaisal n'abandi.

Dj Alisha yashyizwe ku rutonde rw’abarenga 200 bazasusurutsa abazitabira iserukiramuco ‘Nyege Nyege’, kimwe mu bikorwa bya muzika bikurura abantu benshi mu karere no kure yako

Elijah Kitaka

Tar1q

Umunya-Nigeria, Major AJ  

Iri serukiramuco rihuza abahanzi benshi bo muri Afurikan’ababa hanze y’umugabane