Umutoza w'Amavubi yavuze uko yiteguye, anagaragaza impamvu yahamagaye Kavita Mabaya -VIDEO

Kuri uyu wa Gatatu tariki 13 Ugushyingo 2024, habaye ikiganiro n’itangazamakuru cyari kigamije kumenya umwuka uri hagati y’ikipe y’igihugu Amavubi n’ikipe y’igihugu ya Libya mbere y’uko bicakirana kuri uyu wa Kane mu mukino wa Gatanu wo gushaka itike yo kujya mu gikombe cya Afurika cya 2025 kizabera muri Morocco.

Mu kiganiro n’itangazamakuru, umutoza w’ikipe y’igihugu y’u Rwanda, Amavubi, Trosten Frank Spitller, yatangaje ko abakinnyi b’u Rwanda bari mu mwuka mwiza, uretse ko ngo batagomba kwirara kuko uko u Rwanda rushaka Amanota atatu ari nako ikipe y’igihugu ya Libya nayo iyashaka kuko imibare iracyashoboka nubwo bigoye.

Trosten Frank Spitller yagize ati: “ Umwuka ni mwiza mu mwiherero w’ikipe y’igihugu n’ikimenyimenyi duheruka gutsinda umukino twakinnye muri aya marushanwa. Buri wese arishimye, nagumya guhamya ko umwuka ari mwiza, igisigaye ni ukuzahitamo abakinnyi bazabanza mu kibuga tugendeye ku ko ibihe bizaba byifashe.Twiteguye umukino ukomeye uza gukinwa ku munsi w’ejo.

 Ni umukino ukomeye kandi w’ingirakamaro ku buryo buri wese mu ikipe azi uburemere bwawo, nubwo ari akazi katoroshye, navuga ko dufite imbaraga zo kudufasha guca mu bizazane by’ejo. Umusaruro duheruka kubona wagaragaje ko dufite ikipe ikomeye, tuzaba turi gukinira mu rugo, kandi tugomba kumenya ko Libya ikeneye amanota atatu nk’uko natwe tuyakeneye".

Umutoza w’ikipe y’igihugu y’u Rwanda Amavubi, Trosten Frank Spitller yabajijwe ku mpamvu yahamagaye myugariro Kavita Mabaya ndetse n’uko amubona mu minsi ibiri bamaranye, avuga ko hari icyuho mu bwugarizi nyuma y’imvune ya Manzi Thiery atakwizera ko yakina umuko wose, ikiyongereyeho na Myugariro Niyigena Clement akaba amaze kugira amakarita abiri y’umuhondo akaba atemerewe gukina uyu mukino.

Umutoza w’Amavubi yavuze ko mu gihe amaranye na Kavita Mabaya yamubonyemo ubuhanga, cyane ko asanzwe ari na Kapiteni w’ikipe akinira. Umutoza yavuze ko imvune ya Manzi Thiery isa naho yamaze gukira kuko aba ameze neza mu myitozo.

U Rwanda ruracakirana na Libya ruri gushaka ko rwabona amanota atau rukuzuza amanota umunani mu itsinda D mu gushaka itike yo kujya mu gikombe cya Afurika.

U Rwanda kandi ruri gusenga ngo Nigeria izatsinze Benin, kuko rutsinze Libya maze Nigeria igatsinda Benin, rwarara ku mwanya wa Kabiri n’amanota 8, naho Benin ikaguma ku mwanya wa Gtatu n’amanota 6.

">