Umwami Mutara III Rudahigwa yimye ingoma! Menya ibyaranze iyi tariki mu mateka

Tariki 13 Ugushyingo ni umunsi wa 318 mu igize umwaka, hasigaye 48 ugere ku musozo.

Bimwe mu byaranze uyu munsi:

1864: Mu Bugereki hemejwe Itegeko Nshinga rishya.

1887: Mu Mujyi wa Londres rwagati habaye imyigaragambyo ikomeye yahawe inyito ya bloody Sunday; yakozwe hagamijwe gusaba ko umudepite witwa William O’Brien yarekurwa, agakurwa muri gereza nyuma yo gufungwa ashinjwa kwihisha inyuma y’imyivumbagatanyo yibasiye Ireland. Yateguwe na Social Democratic Federation na Irish National League.

1931: Umwami Mutara III Rudahigwa ni bwo yimye ingoma, aho yabaye umwami w’u Rwanda kuva icyo gihe kugeza mu 1959.

1990: Uwitwa David Gray yivuganye abantu bagera kuri 13 muri Nouvelle-Zélande ahitwa Aramoana.

1990: Perezida Habyarimana yemereye amashyaka atavuga rumwe n’ubutegetsi gukora, ndetse anavuga ko ubwoko bugomba gukurwa mu ndangamuntu nubwo bitigeze bikorwa.

1994: Muri Suède habaye kamarampaka yemeje ko iki gihugu kijya mu Muryango w’Ubumwe bw’Ibihugu by’u Burayi.

1995: Ikamyo ipakiye ibisasu yasandariye mu kigo cy’amahugurwa ya gisirikare cy’Abanyamerika ahitwa Riyadh mu gihugu cya Saudi Arabia hagwamo Abanyamerika batanu n’Abahinde babiri. Iki gitero cyigambwe n’itsinda ry’intagondwa za kiyisilamu.

2001: Mu ntambara yo kurwanya iterabwoba, uwari Perezida wa Leta Zunze Ubumwe za Amerika George W. Bush, yashyize umukono ku masezerano ashyiraho Urukiko rwa Gisirikare ruhana abanyamahanga bashinjwa ibikorwa bifitanye isano n’iterabwoba, by’umwihariko ibyibasira igihugu cye.

2002: Mu gikorwa cyo gusaka intwaro za kirimbuzi, Iraq yemeye umwanzuro wa 1441 w’Akanama k’Umutekano k’Umuryango w’Abibumbye.

Bamwe mu bavutse uyu munsi:

1899: Iskander Mirza, wabaye Perezida wa mbere wa Pakistan.

1982: Umunya-Nigeria Samkon Gado wakinnye "American Football.’’

Bamwe mu bitabye Imana uyu munsi:

1983: Umunyamerika Junior Samples wakinaga filime zisekeje.

2008: Jules Archer wari umunyamateka ukomeye muri Amerika.

2010: Ken Iman wamenyekanye cyane nk’uwakinaga American Football.