Ibyo wamenya ku Nama Mpuzamahanga yiga ku mihindagurikire y’ibihe yitabiriwe n’abarimo Perezida Kagame

I Baku muri Azerbaijan hateraniye abakuru b’ibihugu na za guverinoma, abikorera n'imiryango itari iya Leta mu nama ya 29 y’Umuryango w’Abibumbye ishinzwe Imihindagurikire y’ikirere, COP29, aho baganira ku ngaruka z’imihindagurikire y’ibihe n’uburyo bwo kuzikumira.

Perezida wa Azerbaijan, Ilham Aliyev, yabwiye abakuru b’ibihugu na za guverinoma bateraniye mu nama ya 29 ko uyu ari umwanya mwiza wo kugaragaza ko biteguye kugera ku ntego biyemeje ko guhangana n’ikibazo cy’imihindagurikire y’ibihe ihangayikishije Isi muri iki gihe.

Intumwa z'u Rwanda ziri muri iki gihugu, ziteguye kugaragaza intambwe rwateye mu guhangana n’imihindagurikire y’ibihe, harimo kandi gushaka ubushobozi bwo guhangana n’ingaruka z’imihindagurikire y’ibihe ku bihugu biri mu nzira y’amajyambere.

Kimwe mu byo u Rwanda ruzagaragaza muri iyi nama ni intambwe rwateye mu guhangana n’imihindagurikire y’ibihe no gukangurira ibihugu kugana isoko rya carbone ry’u Rwanda.

Muri iyi nama kandi izibanda cyane ku ishoramari mu bidukikije, u Rwanda ruzerekana aho ruhagaze nk’igihugu cyiteguye gushorwamo imari mu mishinga ibungabunga ibidukikije.

Umuyobozi Mukuru wungirije wa REMA, Faustin Munyazikwiye, aherutse gutangaza ko mu nama y’Amasezerano Mpuzamahanga ku mihindagurikire y’ibihe izabera i Baku muri Azerbaijan u Rwanda ruzerekana intambwe rumaze gutera mu guhangana n’ingaruka z’imihindagurikire y’ibihe.

Ati: “Tujyanye ubushake no kugaragaza byinshi rumaze kugeraho umaze kugeraho mu birebana n’urugamba rwo guhangana n’ingaruka z’imihindagurikire y’ibihe, navuga n’Ikigega gifasha mu bijyane no guhangana n’ingaruka z’imihindagurikire y’ibihe (Rwanda Green Fund), nyuma y’imyaka 10 kimaze gukusanya imari irenga miliyoni 200$, kuba twarashyizeho inzego zihamye haba ku rwego rwa Minisiteri y’Imari n’Igenamigambi, nibura uyu munsi dufite ishami rishinzwe ishoramari rigamije guhangana n’imihindagurikire y’ibihe.”

Perezida wa COP29, Mukhtar Babayev, yagaragaje ko ibihugu bikwiye kuzirikana ko buri gikorwa cyose gikwiye kurebwaho kandi ko abantu babura ubuzima kubera ingaruka z’imihindagurikire y’ibihe ari ugutsindwa ku batuye Isi muri rusange.

Biteganyijwe kandi ko u Rwanda ruzagabanya 38% by’imyuka ihumanya rwohereza mu kirere bitarenze mu 2030, hakazifashishwa ingengo y’imari ya miliyari 11$.

Iyi nama iteranye mu gihe ubushyuhe bw’Isi bwongeye kuzamuka mu buryo bukabije ndetse n’ibiza biturutse ku mihindagurikire y’ikirere bikomeje kwiyongera.

COP29 irarebera hamwe ingingo zitandukanye zirimo n’uburyo ibihugu biteganya kugabanya ubushyuhe bwibasiye Isi nk’uko bikubiye mu masezerano ya Paris yo mu 2015, agamije gufata ingamba zo guhangana n'ihindagurika ry'ibihe ryibasiye Isi.

Iyi nama kandi ifite intego yo gukusanya inkunga yo gushyigikira ibikorwa byo guhangana n’imihindagurikire y’ibihe cyane cyane mu bihugu biri mu nzira y'amajyambere, kugira ngo biteze imbere ikoreshwa ry’ingufu zisubira no kugabanya mu buryo bushoboka imyuka ihumanya ikirere.

Kugeza ubu, ibihugu bikize byari byasezeranyije inkunga ingana na miliyari 100 z'Amadolari ya Amerika ku mwaka hagati ya 2020 na 2025, isezerano ritubahirijwe ku gihe, ndetse ibi byasubije inyuma ingamba zo guhangana n’imihindagurikire y’ikirere cyane cyane mu bihugu bikennye.

Inama ya COP29 yitabiriwe n’abahagarariye ibihugu 198, barimo abakuru b’ibihugu bagera ku 100, abahagaragariye imiryango mpuzamahanga n’impirimbanyi mu kubungabunga ibidukikije.

Perezida Kagame yamaze kugera i Baku muri Azerbaijan, aho yitabiriye Inama Mpuzamahanga yiga ku mihindagurikire y'ibihe

Umuyobozi Mukuru wungirije wa REMA, Faustin Munyazikwiye ari mu bahagarariye u Rwanda muri iyi nama

Ni inama yahuje abahagarariye ibihugu 198 biherereye hirya no hino ku Isi