Ishyirahamwe ry'abasifuzi bo mu gihugu cy'u Bwongereza,PGMOL ryahagaritse umusifuzi David Coote ndetse ritangira no kumukoraho iperereza nyuma y'uko agaragaye avuga nabi ikipe ya Liverpool ndetse n'uwari umutoza wayo, Jurgen Klopp.
Ku gicamunsi cyo kuri uyu wa Mbere tariki ya 11 Ugushingo 2024, nibwo ku mbugankoranyambaga hiriwe hacaracara amashusho y'uyu musifuzi arimo aravuga amagambo arimo n'ibitutsi kuri Jurgen Klopp.
David Coote yavuzeko uyu mugabo ari umwibone ndetse anavuga ko hari ubwo yigeze gusifurira Liverpool ikina na Burnley maze uyu mutoza agashaka kumuvugisha kuko yerekanaga ko yabasifuriye nabi ariko we akabyanga kuko atavugana n'umuntu wishyira hejuru.
Usibye ibi kandi uyu musifuzi yanagarutse ku ikipe ya Liverpool nabwo ayivugaho nabi yifashishije amagambo arimo ibitutsi.
Nyuma y'ibi ishyirahamwe ry'abasifuzi mu Bwongereza,PGMOL ryahise ritangira gukora iperereza kuri aya mashusho ndetse riba rinahagaritse David Coote.
Itangazo PGMOL yashyize hanze riragira riti" David Coote yahagaritswe by'agateganyo mu gihe hagitegerejwe iperereza . PGMOL ntizongera gutanga ibisobanuro kugeza iperereza rirangiye".
Uyu musifuzi yatangiye gusifura muri shampiyona y'icyiciro cya mbere mu Bwongereza mu mwaka w'imikino wa 2018/19.
Kugeza ubu kuva uyu mwaka w'imikino watangira muri Premier League, amaze gusifura imikino 6 irimo uheruka Liverpool yatsinzemo Aston Villa ku wa Gatandatu w'icyumweru gishize.
David Coote wahagaritswe nyuma y'uko avuze nabi Liverpool na Jurgen Klopp
Eng
RSS 
TANGA IGITECYEREZO