Kylian Mbappé ntabwo ashaka gukinira u Bufaransa kubera Didier Deschamps

Kylian Mbappé ntabwo ari mu bakinnyi bahamagawe n'ikipe y'igihugu y'u Bufaransa bazakina n'ikipe y'igihugu y'u Butaliyani na Israel mu mikino ya UEFA Nations League itegerejwe mu Cyumweru gitaha.

Umutoza w'iyi kipe y'igihugu, Didier Deschamps yavuze ko kuba ataramuhamagaye atari ukubera ibibazo byavuzwe kuri uyu mukinnyi bijyanye no gufata ku ngufu ndetse avuga ko we yifuzaga guhamagarwa.

Aha benshi batekereje ko impamvu Didier Deschamps atahamagaye Kylian Mbappé ari ukugira ngo amufashe kuva mu bihe bibi byo kutitwara neza arimo ubundi akore imyitozo ku giti cye ariko nk'uko ikinyamakuru Goal.com kibyandika uyu mukinnyi ntabwo umubano we n'umutoza umeze neza.

Kylian Mbappé yumva ko adakwiye gukinira ikipe y'igihugu y'u Bufaransa mu gihe itozwa na Didier Deschamps dore ko ari no ku nshuro ya kabiri yikurikiranya adahamagawe.

Kugeza ubu uyu mukinnyi ntabwo amerewe neza mu ikipe ya Real Madrid yagezemo mu mpeshyi y'uyu mwaka dore ko mu mikino 15 ya mbere amaze gutsinda ibitego 8 ariko mu mikino 6 iheruka yatsinzemo igitego 1.

Umubano wa Kylian Mbappé na Didier Deschamps ntabwo umeze neza 

Kylian Mbappé ntabwo ashaka gukinira ikipe y'igihugu y'u Bufaransa mu gihe itozwa na Didier Deschamps 

Mbappe ari mu bihe bibi muri Real Madrid