Umutoza wa Mukura VS yari yatezwe umukino wa Police FC

Kuri uyu wa Kane taliki ya 7 Ugushingo 2024 Saa cyenda ni bwo Mukura VS yakiriye Police FC kuri Stade Mpuzamahanga ya Huye mu mukino wo ku munsi wa 9 wa shampiyona y'icyiciro cya mbere mu Rwanda.  

Uyu mukino warangiye Mukura VS itsinze Police FC ibitego 2-0 bya Boateng Mensah ku munota wa 41 na Sunzu Bonheur Mende ku munota wa 83.

Nk'uko amakuru InyaRwanda yamenye abivuga iyo Mukura VS itsindwa uyu mukino yari guhita yirukana umutoza wayo ukomoka muri Tunisia, Afhamia Lotfi wayigezemo muri 2022 bijyanye nuko iyi kipe yari imaze iminsi ititwara neza.

Iyi kipe yambara Umukara n'Umuhondo yagiye gukina uyu mukino iri kumwanya wa 8 n'amanota 10 nyuma yuko yari imaze imikino 5 itabasha gutsinda. 

Mukura VS yaherukaga kunganya na AS Kigali 0-0,ikaba yari yaranganyije na Muhazi United 0-0 ndetse ikaba yari yaranganyije na Musanze FC 1-1 nyuma yo gutsindwa na Gorilla FC ibitego 3-1. Iyi kipe yaherukaga gutsinda mu kwezi kwa 9 itsinda Vision FC ibitego 2-1 kuri Stade mpuzamahanga ya Huye.

Muri rusange kuva shampiyona yatangira ikipe ya Mukura VS imaze gukina imikino 9 ikaba imaze gutsindamo imikino 3, ikaba yaranganyijemo imikino 4 naho ikaba yaratsinzwemo imikino 2.

Nubwo bimeze gutya nyamara mbere yuko shampiyona itangira iyi kipe yari yitezweho kuzitwara neza bijyanye n'abakinnyi yaguze barimo Abdoul Jalilu, Agyenim Boateng Mensah na Vincent Adams bakomoka muri Ghana, Alonso Betchoka ukomoka muri Cameroon;

Jordan Dimbumba ukomoka muri Repubilika iharanira Demokarasi ya Congo, Fred Niyonizeye ukomoka mu Burundi, Mende Sunzu Bonheur, Uwumukiza Obed, Tuyizere Jean Luc, Irumva Justin, Ishimwe Abdoul, Mwiseneza Kevin na Irankunda Moria b'Abanyarwanda.

Kugeza ubu ikipe ya Mukura VS iri kumwanya wa karindwi n'amanota 13 ku rutonde rwa shampiyona n'amanota ikaba izasubira mu kibuga taliki ya 28 z'uku kwezi ikina Rutsiro FC.

Afhamia Lotfi yari yatezwe umukino wa Police FC gusa yabashije kuwutsinda