Abanyarwanda dukwiye kwishimira imiyoborere twihitiyemo - Perezida w'Inteko,Hon.Kazarwa Gertrude

Hon.Kazarwa Gertrude uyoboye Inteko Ishinga Amategeko y’u Rwanda Umutwe w’Abadepite, yibukije Abanyarwanda ko bakwiye kwishimira no gusangira imiyoborere bihitiyemo, kandi ntihagire usigara inyuma mu ikoranabuhanga.

Yagize ati: "Ndibutsa Abanyarwanda ko dukwiye kwishimira no gusangira imiyoborere twihitiyemo duharanirako buri muturage agira amahirwe yo gukoresha ikoranabuhanga.”

Hon.Kazarwa yasobanuye ko abagize Inteko Ishinga Amategeko mu nshingano zabo badahwema guharanira ko abaturage bagira uruhare muri gahunda zigamije kubateza imbere ndetse n'uburenganzira bwo kugaragaza ibitagenda mu gushimangira amahame ya Demokarasi.

Mu gihe ubusanzwe Umunsi Mpuzamahanga wa Demokarasi wizihizwa tariki ya 15 Nzeri 2024, Perezida wa Sena, Dr Kalinda François Xavier yavuze ko u Rwanda rwahisemo kuwizihiza uyu munsi kuko itariki yahuriranye n’izindi gahunda, zijyanye no kwimakaza imiyoborere, Abanyarwanda bihitiramo abayobozi, bashyiraho inzego zibabereye.

Yagize ati: “Twahisemo kubaka uburyo bw’imiyoborere bwita ku byo abaturage bakeneye. Uyu munsi, demokarasi yacu, ni ishusho y’ibyifuzo by’Abanyarwanda, bifuza kubaho mu mahoro n’umutekano, no kugira iterambere n’imibereho myiza”

Ibiganiro byo kwizihiza Umunsi Mpuzamahanga wa Demukarasi, byitabiriwe n’Abagize Inteko Ishinga Amategeko, abayobozi mu nzego zinyuranye za Leta, n’imiryango itari ya leta aho bateraniye mu cyumba cy’Umutwe w’Abadepite bungurana ibitekerezo mu rwego rwo gukomeza guteza imbere Demokarasi mu Rwanda.

Perezida w'Inteko Ishinga Amategeko,Hon. Kazarwa Gertrude yibukije Abanyarwanda ko bakwiriye kwishimira no gusangira imiyoborere bihitiyemo