U Rwanda rwizihije Umunsi Mpuzamahanga wa Demokarasi hishimirwa umusaruro w'imiyoborere myiza

Kuri uyu wa Kane tariki 31 Ukwakira 2024, mu Nteko Ishinga Amategeko habaye inama nyunguranabitekerezo yo kwizihiza Umunsi Mpuzamahanga wa Demokarasi.

Ibi biganiro byari bifite insanganyamatsiko igira iti: "Imyaka 30: Umusaruro w'imiyoborere myiza yimakaza Demokarasi n'uruhare rw'ikoranabuhanga."

Perezida wa Sena, Dr Kalinda François Xavier, yavuze ko Abanyarwanda biyemeje demokarasi ibabereye kandi ishingiye ku byo bemeranyijeho birimo gusaranganya ubutegetsi no gushaka umuti w’ibibazo binyuze mu biganiro.

Umuyobozi Mukuru w’Urwego rw’Imiyoborere, RGB, Dr Doris Uwicyeza, yavuze ko u Rwanda rwubatse demokarasi aho umuturage agira uruhare rukomeye mu kwishakamo ibisubizo.

Yagize ati: “Usanga baragizwe abafatanyabikorwa kurusha abagirirwabikorwa.’’

Umuvugizi w’Ihuriro Nyunguranabitekerezo ry'Imitwe ya Politiki yemewe mu Rwanda, Nkubana Alphonse, yavuze ko ubudasa bwa FPR Inkotanyi bwatangiye nyuma yo guhagarika Jenoside yakorewe Abatutsi.

Ati: “Icya mbere, uwari utsinze ayoboye ziriya ngabo yanze kuba Perezida w’Igihugu, murabizi. Sindamubona ngo mubaze ariko ni igikorwa cy’ubutwari, turabimushimira cyane. RPF yafashe amashyaka atarivanze mu bwicanyi, yishyira hamwe abyara ihuriro.’’

Nkubana Alphonse yavuze ko imyaka 30 ishize u Rwanda rubohowe ari gihamya ko nta kaga u Rwanda ruzongera gutezwa n’amashyaka. Ati: “Turasezeranya Abanyarwanda ko nta nduru yo mu mashyaka muzongera kumva. Ibibazo byacu tuzajya tubikemurira aho tugomba kubikemurira kandi imyaka 30 irabigaragaza.”

Umunsi mpuzamahanga wa Demokarasi washyizweho n’inteko rusange y’umuryango w’abibumbye mu 1997, hagamijwe kwimakaza imiyoborere ishingiye ku mahame ya Demokarasi, yemewe mu rwego mpuzamahanga.

Igihugu kigira demokarasi iyo gifite imiyoborere abaturage bacyo bagizemo uruhare ku buryo uba usanga umuturage aza ku mwanya wa mbere muri byose, aho umuyobozi abona umuyobozi nk’umuntu ukwiye gukorera umuturage.

Demokarasi ni imiyoborere yahanganywe n’u Rwanda ku bwa Gihanga Ngomijana kugeza mu 1960 ubwo abakoloni bivangaga mu miyoborere yarwo, ubwami bakabukuraho.

Ikigaragaza ko u Rwanda rwari rufite demokarasi kuva kera, ni uko Umwami atategekaga wenyine kandi buri muyobozi yabaga afite ubwoko aturukamo butandukanye n’undi, bigaragaza ko ubutegetsi bwabaga busaranganyijwe.

U Rwanda rwizihije Umunsi Mpuzamahanga wa Demokarasi