Ikipe ya Real Madrid yafashe umwanzuro wo kutitabira ibirori byo gutanga igihembo cya Ballon d'Or nyuma yo kumenya inkuru mbi ko umukinnyi wayo Vinicius Junior atari we uri buyitware.
Mu mugoroba wo uyu wa Mbere tariki ya 28 Ukwakira 2024 mu gihugu cy'u Bufaransa,i Paris mu nyubako ya Théâtre du Châtelet ni bwo hari butangirwe igihembo cya Ballon d'Or ya 2023/24.
Benshi bari biteze ko iki gihembo kiri bwegukanwe n'umukinnyi w'ikipe y'igihugu ya Brazil na Real Madrid, Vinicius Junior none ntabwo ariwe uri bucyegukane.
Mbere y'amasaha make abura ngo iyi Ballon d'Or itangwe, umunyamakuru Fabrizio Romano yatangaje ko Real Madrid yafashe umwanzuro ko nta mukinnyi wayo uri bwitabire ibi birori iri butangirwemo.
Iyi kipe yafashe umwanzuro nyuma yo kumenya ko umukinnyi wayo, Vinicius Junior atari we uri buhabwe iki gihembo. Byari byitezwe ko hari bujyeyo Perezida w'iyi kipe, Florentino Perez, umutoza wayo, Carlo Ancelotti, abakinnyi bayo; Vinicius Junior, Kylian Mbappé na Jude Bellingham ariko nta n'umwe uri bujyeyo.
Mu mwaka ushize w'imikino Vinicius Junior yakiniye Real Madrid imikino 26 muri shampiyona atsindamo 15 anatanga imipira 5 yabivuyemo naho muri UEFA Champions League akinamo imikino 10 atsindamo ibitego 6. Yayifashije kwegukana igikombe cya shampiyona ndetse n'icya UEFA Champions League.
Byitezwe ko uri bwegukane igihembo cya Ballon d'Or ari Rodrigo ukinira ikipe ya Manchester City wayifashije kwegukana igikombe cya Premier League akanafasha ikipe ye y'igihugu ya Espagne kwegukana Euro.
Amakuru mashya ari kuvuga ko Vinicius atari we uri bwegukane Ballon d'Or
Eng
RSS 
TANGA IGITECYEREZO