Premier League: Manchester United yabonye amanota 3, igitutu kiragabanyuka ku mutoza wayo

Ni mu mukino wakinwe kuri uyu wa Gatandatu taliki ya 19 Ukwakira 2024 Saa kumi zuzuye kuri Old Trafford.

Umukino watangiye ikipe ya Brentford ariyo isatira ugereranyije na Manchester United ndetse inarema uburyo imbere y'izamu binyuze ku bakinnyi bayo barimo Brayn Mbeumo warekuraga amashoti aremereye ariko akanyura impande y'izamu.

Ikipe ya Manchester United nayo yaje kwinjira mu mukino ndetse ikarema uburyo imbere y'izamu . 

Ku munota wa 25 iyi kipe y'amashitani atukura yakije umuriro imbere y'izamu rya Brentford ishaka igitego gusa ikarata uburyo nk'aho uwitwa Alejandro Garnacho yarekuye ishoti umunyezamu wa Brentford akarishyira muri koroneri ku mupira mwiza yahawe na Casemiro.

Ku munota wa 35 Andre Onana wa Manchester United yayitabaye ku ishoti riremereye ryari rirekuwe na kapiteni wa Brentford, Christian Norgaard gusa birangira arishyize muri koroneri.

Mbere yuko igice cya mbere kirangira ikipe ya Brentford yaje gufungura amazamu ku gitego cyari gitsinzwe na Ethan Pinnock ku mupira yarahawe na Mikkel Damsgaard. 

Mu gice cya kabiri ikipe ya Manchester United yaje yariye amavubi biyitwara iminota 2 gusa ihita itsinda igitego cyo kwishyura gitsinzwe na Alejandro Garnacho ku mupira yahawe na Marcus Rashford

Ikipe y'amashitani atukura yakomeje gusatira ishaka igitego cy'itsinzi maze bigeze ku munota wa 62 uwitwa Christian Ericksen aha umupira mwiza Bruno Fernandes nawe akoresheje agatsi awusunikira Rasmus Hojlund nawe nta gutinzamo yinjira mu rubuga rw'amahina ubundi aroba umunyezamu umupira uragenda unyeganyeza inshundura.

Nyuma yo kubona igitego cya kabiri Manchester United yakomeje gusatira ndetse hari naho yagombaga kubona igitego cya gatatu ariko uwitwa Joshua Zirkzee aratungurana arakirata ku mupira mwiza yarahawe na Marcus Rashford.

Umukino warangiye Manchester United yegukanye amanota atatu ku bitego 2 kuri 1 cya Brentford, bifasha umutoza wayo Erik Ten Hag kugabanya igitutu yari ariho cyo kutabona intsinzi ndetse no kwirukanwa.

Iyi kipe y'amashitani atukura yahise ijya ku mwanya wa 10 n'amanota 11 naho Brentford yo ijya ku mwanya wa 12 n'amanota 10.

Alejandro Garnacho yishimira igitego yatsinze