Cristiano Ronaldo ni we uyoboye! Urutonde rw’abakinnyi ba ruhago binjiza amafaranga menshi kurusha abandi

Ni ibikubiye muri raporo ngarukamwaka yashyizwe hanze na Forbes Magazine muri iki cyumweru. Abakinnyi bane kuri uru rutonde bakina muri shampiyona ya Arabia Saudite. 

Muri aya mafaranga Cristiano Ronaldo yinjije harimo miliyoni 168 z'Amapawundi ahabwa na Al Nassr n'andi miliyoni 50 z'Amapawundi akura mu bo yamamariza.

Uyu mukinnyi yahigitse mugenzi we Lionel Messi uza ku mwanya wa kabiri aho yinjije agera kuri miliyoni 103 z'Amayero ahabwa na Inter Miami ndetse na miliyoni 57 ahabwa n'abo yamamariza barimo Adidas, Apple TV na Konami.

Abandi bakinnyi bakurikiraho kuri uru rutonde ni Neymar ukinira ikipe ya Al Hilal yo muri Arabia Saudite aho iyi kipe imuha agera kuri miliyoni 62 z'Amapawundi naho mu bijyanye no kwamamaza akahasarura agera kuri miliyoni 23.

Karim Benzema ukinira Al Ittihad yo muri Arabia Saudite niwe uri ku mwanya wa kane aho yinjiza agera kuri miliyoni 76 z'Amapawundi.

Kylian Mbappé uheruka kugera ku nzozi ze zo gukinira Real Madrid, ari ku mwanya wa gatanu ndetse hakazamo n'andi mazina arimo Erling Haaland wa Manchester City na Vinicius Jr wa Real Madrid.

Uko abakinnyi 10 ba mbere ku Isi bakurikirana mu kwinjiza agatubutse:

1. Cristiano Ronaldo; Umunya-Portugal ukinira Al Nassr winjiza miliyoni 218 z'Amapawundi 

2. Lionel Messi: Umunya-Argentine ukinira Inter Miami winjiza miliyoni 103 z'Amapawundi 

3. Neymar: Umunya-Brazil ukinira Al Hilala winjiza miliyoni 85 z'Amayero 

4.Karim Benzema: Umufaransa ukinira Al Ittihad- winjiza miliyoni 80 z'Amapawundi 

5.Kylian Mbappé: Umufaransa ukinira Real Madrid winjiza miliyoni 69 z'Amapawundi 

6. Erling Haaland: Umunya-Norway ukinira Manchester City winjiza miliyoni 46 z'Amapawundi 

7. Vinicius Jr.: Umunya-Brésil ukinira Real Madrid winjiza miliyoni 42 z'Amapawundi 

8. Mohamed Salah: Umunya-Misiri ukinira Liverpool yinjiza miliyoni 41 z'Amapawundi 

9. Sadio Mané: Umunya-Sénégal ukinira Al Nassr yinjiza miliyoni 40 z'Amapawundi 

10. Kevin De Bruyne: Umubiligi ukinira Manchester City winjiza miliyoni 30 z'Amapawundi