Imyaka ibiri irashize APR FC idatsinda Gasogi ! Icyo imibare yerekana mbere y'umunsi wa Gatandatu

Ku munsi w'ejo ku wa Gatandatu nibwo hazatangira gukinwa imikino yo ku munsi wa Gatandatu wa shampiyona y'icyiciro cya mbere mu Rwanda ya 2024/25.  

Saa Cyenda ikipe ya Etincelles FC izaba yakiriye Amagaju FC, Musanze FC yakire Mukura VS,Muhazi United yakire Rutsiro FC, Rayon Sports yakire Bugesera FC naho APR FC yakire Gasogi United Saa Moya z'Umugoroba kuri Kigali Pelé Stadium.

Ku Cyumweru ikipe ya Police FC izakira Gorilla FC naho Marine FC yo yakire Kiyovu Sports mu gihe ku wa Mbere ho ikipe ya AS Kigali izakira Vision FC.

Icyo imibare yerekana ku mikino imwe

Imibare yerekana ko kuva muri 2015 kugeza muri uyu mwaka ,Rayon Sports imaze gukina na Bugesera FC inshuro 17 muri shampiyona. Rayon Sports yatsinzemo imikino 15,banganya umukino 1 naho Bugesera FC itsindamo umukino 1. 

Uyu mukino umwe ikipe ya Bugesera FC yawutsinze tariki ya 21 z'ukwezi kwa 10 mu 2017, ikaba yarayitsinze igitego 1-0,ubwo bivuze ko hashize imyaka 11 itazi uko kuyitsinda bimera.

Muri iyi mikino 17 amakipe yombi amaze gukina, Rayon Sports yinjijemo ibitego 32 naho Bugesera FC yo yinjizamo ubitego 6. Rayon Sports igiye gukina uyu mukino iri ku mwanya wa 4 n'amanota 8 mu gihe Bugesera FC yo iri ku mwanya wa 12 n'amanota 3.

Ku mukino wa Etincelles FC n'Amagaju FC, imibare yerekana ko aya makipe yombi amaze gukina imikino 22 kuva muri 2009. Etincelles FC yatsinzemo ibitego imikino 11, Amagaju FC yo itsindamo ibitego 7,banganya imikino 4. Etincelles FC iri ku mwanya wa 11 ku rutonde rwa shampiyona kugeza ubu ,muri iyi mikinp yinjijemo ibitego 20 naho Amagaju FC ari ku mwanya wa 8 yo yinjijemo ibitego 18.

Ku mukino wa Musanze FC na Mukura VS,kuva mu  2010 aba bombi bamaze guhura inshuro 37. Musanze FC yatsinzemo imikino 9,Mukura VS itsindamo imikino 11, banganya imikino 7. Musanze FC yinjijemo ibitego 27 naho Mukura VS yo yinjizamo ibitego 35. Kugeza ubu ikipe ya Musanze FC iri ku mwanya wa 9 mu gihe Musanze FC yo iri ku mwanya wa 7.

Ku mukino wa Marine FC na Kiyovu Sports, aya makipe yombi amaze gukina imikino 28 kuva mu 2010. Marine FC yatsinzemo imikino 8 , Kiyovu Sports itsindamo imikino 12 naho banganya imikino 8. Marine FC yinjijemo ibitego 24 naho Kiyovu Sports yinjizamo ibitego 35. Kugeza ubu Marine FC iri ku mwanya wa 10 mu gihe Kiyovu Sports iri ku mwanya wa 14.

Ku mukino wa APR FC na Gasogi United, imibare yerekana ko aya makipe yombi amaze gukina imikino 7 kuva mu 2019 muri shampiyona. APR FC yatsinzemo imikino 3,banganya 4 mu gihe Gasogi United yo itaratsinda umukino n'umwe.

Ikipe y'Ingabo z'igihugu yinjijemo ibitego 8 naho Gasogi United yo yinjizamo ibitego 3. Nubwo bimeze gutyo ariko APR FC iheruka gutsinda Gasogi United muri shampiyona mu 2022 hakaba hari tariki ya 05 z'ukwezi kwa 3 aho yayitsinze ibitego 2-0.

Uyu mukino ugiye kuba APR FC iri ku mwanya wa nyuma n'inota 1 mu gihe Gasogi United yo iri ku mwanya wa 5 n'amanota 8.