Lionel Messi yatangaje ko yiyumva nk'aho ari umwana iyo ari mu ikipe y'Igihugu ya Argentine nyuma yo kunyagira Bolivia ibitego 6-0 mu mukino wakinwe mu rukerera rwo kuri uyu wa Gatatu.
Muri ibi bitego uyu mukinnyi ubitse Ballon d'Or 8 yagizemo uruhare ku bitego 5 aho yatsinze 3 wenyine ndetse akanatanga imipira 2 yabivuyemo.
Yatsinze igitego ku munota wa 19,84 ndetse n'uwa 86 anatanga umupira ku gitego cyatsinzwe na Lautaro Martinez ku munota wa 43 ndetse n'icyatsinzwe na Julian Alvarez ku munota wa 45+3.
Ibi byahise bituma yuzuza ibitego 112 atsindiye ikipe y'igihugu aho arushwa na Cristiano Ronaldo ibitego 13 dore ko we amaze gutsindira Portugal ibitego 113.
Nyuma y'umukino, Lionel Messi yatangaje ko arimo araryoherwa ndetse ko uretse imyaka ye iyo ari mu ikipe y'Igihugu ya Argentine aba yumva ari nk'umwana.
Ati: "Ni byiza rwose kuza hano, kumva urukundo rw'abantu. Ibi biransunika. Ndimo ndaryoherwa no kwishimira aho ndi. Uretse imyaka yanjye, iyo ndi hano mba numva ndi umwana kuko nishimiye iyi kipe. Igihe cyose numva meze neza kandi nshobora gukomeza gukora uko nshaka, nzakomeza kubyishimira".
Lionel Messi ari gutangaza aya magambo nyuma yuko yari yangaje ko igikombe cy'Isi cya 2022 ari cyo cya nyuma azaba akinnye ariko akomeje gutanga ibimenyetso ko n'icya 2026 kizabera muri Leta zunze ubumwe z'Amerika, Mexico na Canada nacyo ashobora kuzagikina.
Lionel Messi yavuze ko iyo ari mu ikipe y'Igihugu ya Argentine yiyumva nk'aho ari umwana
Eng
RSS 
TANGA IGITECYEREZO